La Fundación Municipal de Cultura, Educación y Universidá Popular (FMCEyUP) de Xixón presenta Sonamos Xuntes, un proyectu nuevu que busca visibilizar les desigualdaes de xéneru existentes nel sector musical asturianu. La iniciativa, integrada dientro del programa XixonFemMusic ta acabante de poner en marcha un sondéu abiertu a la ciudadanía col fin de recoyer datos y testimonios al rodiu la situación de les muyeres na música n’Asturies.
«¿Por qué malpenes topamos compositores na historia de la música? ¿Por qué lo habitual nuna banda de rock ye que les muyeres seyan cantantes y los homes instrumentistes? ¿Qué torgues alcuentren les muyeres p’acceder a esti sector profesional?», son dalgunes de les cuestiones a les que quier dar respuesta esti estudiu que va facer públicos los sos resultaos partir de setiembre de 2026 al traviés de la web municipal de Xixón y d’actividaes presenciales.
Sonamos Xuntes forma parte del programa XixonFemMusic, una iniciativa municipal nacida en 2024 pa fomentar la igualdá y dar visibilidá a les muyeres na industria musical. Ente les sos acciones destaca’l Semilleru de Bandes, un programa de formación dirixíu a bandes compuestes por muyeres dafechu y que celebra anguaño la so segunda edición.
La encuesta de Sonamos Xuntes ta abierta a cualquier persona venceyada cola música n’Asturies, tanto profesionales como amateurs, amás d’entidaes, asociaciones y empreses del sector. El cuestionariu pue completase de forma anónima y lleva alredor de siete minutos.
Dende la organización animen a participar a tola comunidá musical asturiana «col oxetivu de visibilizar y comprender el techu de cristal al que s’enfrenten les muyeres na música» y asina contribuir a crear una radiografía real de la situación actual y ayudar a diseñar futures midíes d’igualdá nel sector.
Suscríbite a les nuestres novedaes
