Del 31 de xunetu al 9 d’agostu, la llocalidá bretona de Lorient va acoyer la 55 edición del Festival Interceltique, qu’esti añu va tar dedicáu a Cornualles. L’eventu más prestixosu del mundu celta ta acabante d’anunciar la so programación completa, na que, como tolos años, hai presencia asturiana nos conciertos, espectáculos, desfiles y masterclasses a traviés de diez artistes y agrupaciones que formen la Delegación Asturiana.
Nesta edición, les agrupaciones tradicionales que van representar al país son la Banda Gaites El Gumial d’Ayer y el Grupu Etnográficu L’Oriente, que van facer dellos pases tolos díes del festival, amás d’actuar nel desfile de les naciones celtes (Horizons Celtiques) y en La Place des Pays Celtes y l’Espace Jean Pierre Pichard. En cuantes a artistes, la delegación ta formada por propuestes moces y veteranes que representen a varios estilos de la música n’asturianu. Asina ye como na primer selmana d’agostu actúen el tríu de folk de cámara Entós (llunes 3); la banda de música tradicional Rellume (llunes 3); el dúu d’electrónica de raigañu Llevólu’l Sumiciu (martes 4); el gaiteru folk-rock Rubén Alba (martes 4); la formación de música tradicional fusionada Herbamora (xueves 6); y l’artista vanguardista Ferla Megía (sábadu 8).
La presencia asturiana complétenla Iñaki Santianes que, amás de ser el responsable del festival n’Asturies, actúa’l miércoles 5 dientro de L’Irlande Symphonique, l’espectáculu especial que se programa esti añu; el gaiteru Diego Lobo, que va poner una masterclass; y les cuatro persones que se clasifiquen pal Troféu MacCrimmon de gaita. La Delegación Asturiana nel FIL cunta cola collaboración de la Conseyería de Cultura, Política Llingüística y Deporte y la Viceconseyería de Turismu.
Suscríbite a les nuestres novedaes
