L’Alcuentru Trad-Urbán, la xuntanza protagonizada pola música y el baille de tresmisión oral d’Asturies y Galicia d’anguaño torna’l sábadu 22 de marzu. Les Pites, Santi Galguera, l’Asociación Cultural Llacín y A Volta do Agro (Lugo) entamen l’eventu en Porrúa (Llanes) con talleres, alderique, conciertos y espicha. Toles persones que quieran pueden averase, previa inscripción nesti enllaz.
El Muséu Etnográficu de l’Oriente d’Asturies, La Bolera y La Escuela en Porrúa van ser los escenarios de les primeres actividaes. Santi Galguera, Carla Riquelme y Xandre Outeiro van poner clas de pandereta y baille en dos niveles -aniciu y avanzáu- dende les 11h. Darréu, la so tradicional mesa redonda tresfórmase nun alderique con muyeres tresmisores de la tradición oral de dambos territorios, Piornedo pela parte gallega y Porrúa pela asturiana. Alma Hidalgo va moderar esti espaciu nel que les informantes van compartir les sos esperiencies y puntos de vista sobre la evolución de la música y el baille nes últimes décades.
Los conciertos de Pandeireteiras A Volta do Agro (Lugo), Flor d’Agua (Degaña) y Comando Curuxás (Galiza) van rematar esta xornada de convivencia y intercambiu de dambes cultures. Mesmo los conciertos que l’alderique son d’accesu llibre, pero los talleres y la espicha tienen un preciu de 30 o 40 euros. Puede topase más información sobre la programación na web del Alcuentru Trad-Urbán.
Suscríbite a les nuestres novedaes
