Álvarez Pola dedica la so tesis doctoral a la música nel conceyu de Quirós

Nel mes d’agostu’l musicólogu Luis Francisco Álvarez Pola presentaba y defendía na Universidá d’Uviéu la so tesis doctoral titulada La música en el concejo de Quirós; con ella llograba una calificación de sobresaliente cum laude y yera propuesta a Premiu Estraordinariu. Trátase d’un testu monumental (1.468 páxines) que-y llevó cuatro años de trabayu, anque los llabores de recopilación de testimonios escomenzólos hai una década, yá que bona parte del conteníu ta basáu nes fontes orales. Ésti, inclúi 172 biografíes de músicos, 482 pieces de la tradición oral recoyíes y trescrites en testu y partitura, reseñes sobre 27 formaciones musicales y 16 locales con actividá musical, amás d’una panorámica xeneral fonda sobre la historia musical quirosana. D’ente la bayura d’información atropada nesta tesis destaca la importancia de la misa de gaita, una modalidá llitúrxica promovida pol cleru del conceyu pero que llegó, mesmamente, a tar prohibida en determinaos momentos históricos. En cuantes a les biografíes, nun podíen faltar les de personalidaes musicales importantes como’l gaiteru Manolo Quirós o la cantadora Diamantina Rodríguez, dambos orixinarios de Quirós.

Álvarez Pola ye multiinstrumentista (gaita, pianu, acordión…) y cantor de mises de gaita, tien acompañao a intérpretes como Anabel Santiago, Héctor Braga o Odón del Paganéu. Anguaño, tien entamáu un archivu de la música asturiana con una colección de partitures antigües, discos de pizarra y vinilu y semeyes. Ye presidente de l’Asociación Folclórica y Cultural Teixo-Manolo Quirós y dirixe la banda de gaites del mesmu nome.

Discos de música tradicional y folk a la venta na tienda