El pasáu domingu entamó la primer fase del XIII Concursu de Canción Asturiana Conceyu de Siero, ún de los eventos institucionales más veteranos dedicaos a l’asturianada. Esti certame entamáu pol Ayuntamientu Siero, la so Fundación Municipal de Cultura y AFATRA (Asociación de Folclore Amigos de la Tradición) celébrase hasta’l 29 de xunu tolos domingos a les 11.30h nel Auditoriu CPI Llugones y nel Teatru Auditoriu de La Pola. El 13 de xunetu va ser la gala de premios d’un concursu que ye clasificatoriu pal Premiu ‘La Busdonga’ d’Asturianada.
Pa esta edición inscribiéronse 42 persones dividíes en 27 na categoría absoluta masculina, 8 na femenina y 7 na de mocedá. Hai siete premios nes categoríes absolutes y premios nes modalidaes de canción, ayerana, vaqueira (memorial Graciano Gutiérrez “Radio Pola”) y canción dialogada (memorial Agustín Argüelles y Diamantina Rodríguez). La categoría moza ye amuesa -lleven toos el mesmu troféu, diploma y regalos- pero puntuable pal II Premiu Obdulia Álvarez ‘La Busdonga’ d’Asturianada.
Na segunda xornada d’esti certame van participar un total de diez persones: Marcelino Fernández García (Cantabria), Jose Luis Sánchez Verdeja (Peñamellera), Guzmán González Gutiérrez (Siero), María Latores (Uviéu), Manuel Sañudo Sanz (Cantabria), José Sánchez Sánchez (Peñamellera), Piedad García Guerra (Xixón), Fernando García Nuño (Siero). Cristina Sánchez Sánchez (Peñamellera) y Isaac Sierra Longo (Parres).
Suscríbite a les nuestres novedaes
