Nun hai duldes de qu’Héctor Braga ye una figura versátil: multiinstrumentista, cantante, doctor en Musicoloxía, estudiosu de la tradición… Nos discos que tien publicaos en solitario pue sentise asturianada, folk, música tradicional, canción d’autor y, agora da un pasu más. Cola publicación en CD y en toles plataformes dixitales de Rabil, el polifacéticu artista amuesa’l so soníu más folk, más celta y más rockeru a lo llargo de diez temes nos que rescamplen destacaes collaboraciones y nos que la gaita rabil o zanfona ye la protagonista.
Dempués de tres años de trabayu pue sentise’l resultáu d’un discu nel que la gaita rabil percuerre cantares al rodiu lleendes, historia y mitoloxía que suenen sobre melodíes de contundente folk celta. Producíu por Javier Blanco (Mägo de Oz, Sôber), nel álbum collaboren una montonera d’artistes: Víctor Manuel, Hevia, Algaire, Baxel, Deira, Joaquín Díaz, Luis Delgado, Óscar Ibáñez y Bango, amás de les bandes de gaites Picos d’Europa, LaKadarma y la berciana Castro Bérgidum.
“Si hai música mediterránea, andalusí, sefardí, metal vikingo y hasta rock gótico, ¿cómo nun va a haber música celta?«, reivindica Braga na presentación d’esti trabayu enllenu «d’épica y mitoloxía ente vertixinoses melodíes folkies», que tien a la «gaita rabil como filu conductor» y qu’ufre «una estética renovada, moderna y contemporánea».
Coincidiendo col llanzamientu de Rabil, Musicasturiana.com incorpora al catálogu de la so tienda otros tres discos del músicu llangreanu: Fundamentos de l’asturianada (2019), La Fonda de Lola (2015) y A mi manera (2019). Son trabayos qu’amuesen la diversidá d’un músicu y etnomusicólogu que nos años 90 entamó a tocar n’agrupaciones como la Orquesta de Cámara del Nalón y foi cofundador del grupu folk Llangres.
La so carrera en solitario principió en 2004 y con ella tien agora ocho discos publicaos ente los qu’hai asturianada, música tradicional -tanto na so espresión más “pura”, como fusionada a estilos contemporáneos- y temes de composición propia. Tien tamién dellos premios algamaos -como’l Máximu Fuertes Acevedo d’Ensayu cola so obra Nel Cantu la Memoria– y xiró per toa la Península, Europa y incluso Marruecos.
Suscríbite a les nuestres novedaes
