El Kuivi presentábase esti sábadu como un fornu pa celebrar la folixa 20 años de Skama la Rede. Les entraes agotáronse una selmana enantes y la xente entraba con esa sorrisa de quien sabe que va vivir daqué grande. Pa calecer motores, DJ Avante’l Pueblu entamó con una sesión de punk y rock estatal demientres el públicu diba averándose. L’ambiente yera de celebración, pero tamién de reconocencia: 20 años de Skama la Rede nun se cumplen tolos díes.
Esti pasáu avientu el grupu asoleyara’l discu 20 años, que al contrario de lo que pueda paecer, nun ye un recopilatoriu de los meyores temes (eso yá lo ficieran con 15 Aniversariu) sinón 8 cantares, dalgunos d’ellos yá publicaos en formatu single en 2019 y otros inéditos. Esti conciertu nun yera namás la presentación d’esi discu, sinón la oportunidá pa Skama de xuntar a munchos collacios, enriba y embaxo l’escenariu, y celebrar estes yá más de dos décades nos escenarios.
Puntuales, al dar les 22:00 de la nueche, apagábense les lluces y entamaba a sonar la intro del conciertu. La música electrónica amestábase a cachinos d’un discursu de Fidel Castro o el yá clásicu meme de “queremos ir a misa” ente otres y terminando cola intervención d’Hugo Chávez en 2008 que diz “Váyanse al carajo yankis de mierda, que aquí hay un pueblo digno”, Skama la Rede salíen al escenariu pa entamar el conciertu coles enerxíes a tope.
Nesta tanda inicial la banda foi caleciendo de menos a más, repasando temes que van del La nuesa hestoria (2005) hasta los últimos asoleyaos que traíen pa presentar. Entamaron con ‘¿Ónde ta?’, del primer discu, canciu dedicáu a tolos emigraos d’Asturies por trabayu, una “lleenda urbana” qu’entá sigue mui viva. Siguieron varios temes con esi aire ska y baillongu del grupu, que se notaba taba esfrutando nesti conciertu tan especial. Sonaron: ‘Ye por vosotros’, ‘Un espeyu cara al sol’, ‘Coses de la edá’ y ‘Traidor’. Esta primer parte zarróse con dos temes del discu Echaos a la mar: ‘Echa a correr’ y el míticu ‘Nin un pasu atrás’. Nel Kuivi esi día yeremos más y teníemos la razón.
Con Raque d’Ochobre entamó la tanda de collaboraciones. La tamién cantante La Morgue xubió al escenariu pa cantar ‘Sois la llume’ col so característicu chorru de voz. Ochobre como banda moza que garra’l testigu de grupos como Skama y que siguen presentando el so discu La rabia nos dientes, como yá ficieron en payares n’Uviéu. El conciertu siguió alantre colos vientos al frente y un públicu mui entregáu nos temes ‘El dueñu’l mundiu’ y ‘Paconismu o Barbarie’. ‘Avante’, del discu homónimu, cuntó cola collaboración de Juankar del grupu de punk-rock estatal Boikot. Míticu estandarte de la escena rock estatal que nun quixo perdese esti eventu. Tolos cancios de Skama dan pa baillar pero pocos ponen a la xente a movese tanto como ‘Villaska’, que foi’l siguiente tema. Pa ‘Escoyí’ cuntaron cola collaboración del cantante de Misiva, Humber, pues anque’l grupu nun ta n’activu al cantante sigue “picándo-y el niki” y nun quier perdese folixes de collacios como estes.
‘Escuela asturiana’, un tema del so últimu discu, convirtióse nún himnu automáticu namás salir y amuesa la capacidá que sigue teniendo la banda pa sacar temes que tán d’actualidá dafechu y con un compromisu políticu que ye seña d’identidá. ‘Al debalu’ cuntó, como nel discu, cola collaboración de Pirri, frontman del míticu grupu hardcore asturianu Escuela de Odio, que xubía al escenariu dempués de dos años apartáu d’ellos por problemes de salú. Ún de los grandes momentos del conciertu llegó col tema ‘Internacionalista’ y con un públicu entregáu nel que vimos ondeando banderes como l’asturina, la feminista y la LGTB+. Tamién con un Burilo ondeando l’asturina que podemos inmortalizar, como’l cuadru de la revolución francesa, con un “Skama la rede guiando al pueblu”. Esta parte del conciertu terminó con ‘Nunca vais poder’ y la collaboración de Gabri, cantante del grupu gallegu Dakidarría, nel tema ‘Primaveres’.
La reivindicación nel conciertu nun diba quedar namás nes lletres de los cantares, pues los momentos de folixa tamién pueden selo de llucha y de reivindicación. Aprovechando un pequeñu descansín del grupu, que se preparaba pa la traca final, pudieron salir al escenariu compañeres del grupu de sofitu a les 6 de La Suiza, con una pancarta y lleendo un comunicáu sobre la situación de les sindicalistes. Esti momentu terminó col públicu nun solu glayíu: «¡6 de La Suiza, Llibertá!«.
La última parte del conciertu entamó con ‘Soi de verdiciu’, primero con un poco del cantar de chigre orixinal gracies a la voz de Pastrana, gaiteru de Skontra, y dempués yá na versión ska-rock que fai’l grupu lluanco-candasín-maliayu dende va munchu tiempu. Pal tema ‘Da-yos caña’ de Dixebra, xubió al escenariu’l so cantante, Xune Elipe, cola so carauterística coreografía qu’inclúi pataes voladores y más estiramientos de los que puede facer, con bastantes años menos, quien escribe esti artículu. L’homenaxe siguió col míticu tema de Llan de Cubel, ‘La casa gris’, cola collaboración a la gaita de Xuan, Aida y Dani (músicos de Llan de Cubel y Corquiéu ente otros). Mediu millar de persones coreando ‘La casa gris’, ehí ye nada. Enantes de que llegaren los bises tocó’l turnu de Daviz del grupu asturianu Mala Reputación pa salir a collaborar nel tema ‘Ella nun escaez’, que pon el puntu de mira na Memoria Hestórica y lo que tovía queda por facer nesi sen.
La hora diba xusta y nun tuvo muncho tiempu’l públicu nin pa pedir “Otres trés”, que yá taba enllenándose l’escenariu de nueves. Esta vez, cola reivindicación llingüistica de la Oficialidá, gracies a la Xunta Pola Defensa de la Llingua Asturiana. El cantar ‘La pita de la Xunta’ llegó con pancarta d’activistes d’esta organización y tamién cola presencia de la mítica pita enriba l’escenariu, qu’esi día nun taba pa poner coloráu a nengún presidente del Principáu sinón namás pa siguir reivindicando un drechu como ye la oficialidá del asturianu. El canciu cuntó cola collaboración de Berto y Delfo, de Skontra y La Tarrancha respeutivamente. ‘Campu de batalla’ foi’l siguiente tema y nél taben a la gaita Natalia (Ochobre) y Pastrana (Skontra), nun cachu del cantar sustituyendo al gaiteru titular que tiró primero la gaita al públicu y llueu tiróse él como si d’una piscina de boles se tratare. La xente entregao formaba una sola voz y un solu movimientu al ritmu del ‘Asturies Borracha’, poniendo (cuasi) el puntu final a esa nueche. Pa despidir y cola ayuda de tolos convidaos enriba la tarima, sonó’l míticu popurrí del grupu nos directos ente ‘Chacho’ de Los Berrones y ‘La resaca yá vendrá’.
Presta muncho saber que’l conciertu quedó grabáu en vídeu y que vamos poder esfrutar viéndolu nun futuru, pero la maxa que se vivió na xornada del vienres va ser díficil poder revivila pa quien lo vea ensin poder tar esfrutándolo en directo. El grupu amosó tar en forma tres d’estos venti años y que pueden siguir dándolo too unos cuantos más. Dempués del conciertu siguió DJ Avante’l Pueblu poniendo’l ramu a la nueche pa la xente que quedó a baillar col so mecigayu d’estilos y temes. Una nueche a recordar pa la música n’asturianu y pa la música asturiana.
Semeyes d’Iván G. Fernández cedíes por él mesmu y Skama la Rede.
Suscríbite a les nuestres novedaes
