Esti sábadu 24 de setiembre, a partir de les 18:00 hores, nel Albergue El Cascoxu de Chanos (L.lena), el músicu y escritor Xune Elipe, va ufiertar la charra titulada La música del Camín. Trátase d’una de les actividaes enmarcaes dientro del circuitu Asturies, Cultura en Rede, qu’entama la Conseyería de Cultura, Política Llingüística y Turismu.
El componente de Dixebra y autor del ensayu Hai una llinia trazada. Historia de la música asturiana fai nesta actividá un percorríu pel contestu históricu, social y artísticu nel que nació y se desenvolvió’l Camín de Santiago, aparándose fondamente en cómo la música asturiana tuvo presente nél. Con un desarrollu cronolóxicu, Elipe va esgranado los datos principales del tema, acompañándolos d’anécdotes y curiosidaes: dende cómo surdió’l Camín de Santiago, cuála foi la so inluyencia na música del país, el movimientu trovadorescu y la xuglaría n’Asturies o los instrumentos musicales; too ello ilustrao con bien de vídeos, semeyes, infografíes y audios.
Dase la circunstancia de que’l llugar de Chanos alcuéntrase nuna de les etapes del llamáu Camín del Salvador (Lleón-Uviéu) y que l’albergue ye parada obligatoria pa los pelegrinos que lu faen.
Suscríbite a les nuestres novedaes
