Silvia Quesada y Alfredo González participen nel «Festival de Músicas e Artes Atlánticas» en Compostela

Dende’l miércoles 21 y hasta’l domingu 25 de setiembre ta desenvolviéndose en Compostela (Galicia) la tercer edición del Festival de Músicas e Artes Atlánticas-Maré. Un alcuentru artístico-musical nel que participen más de trenta solistes y formaciones llegaos dende distintes partes del mundu. El Festival preséntase como «Un mapa común entre territorios, con Galiza como epicentro Atlántico, lugar de encontro e diálogo a través da música e outras artes». Concretamente, nesta edición hai intérpretes llegaos de Cataluña, Asturies, Euskadi, Angola, Brasil, Portugal, India, Balcanes, Arxentina, Francia, Sahara Occidental, Guinea-Bisáu y Escocia, amás d’una representación amplia de Galicia.

Los representantes asturianos van actuar en dos ocasiones, la primera como artistes invitaos nel conciertu fin de xira de la cantante gallega Guadi Galego (sábadu 24 nel Teatro Principal), cola que tienen collaborao en delles ocasiones; y la segunda’l domingu 25 na Sala Riquela. Esta última actuación enmárcase na celebración del Día Europeo de les Llingües, una xornada na que tamién tán previstos conciertos, en diferentes sitios de la ciudá, d’Antía Muiño (Galicia), Olatz Salvador (Euskadi), Mû Mbana (Guinea-Bisáu), Dandara Manoela (Brasil), Peña (Galicia), Paula Grande (Cataluña), A Pedreira (Galicia) y Sumrrá (Galicia).

El Festival de Músicas e Artes Atlánticas-Maré apuesta pola creación femenina y de la mocedá, la esperimentación, los nuevos llinguaxes artísticos y la diversidá cultural, poniendo’l focu naquellos territorios colos que Galicia comparte llazos llingüísticos, históricos y otros sentimentales de les dos orielles del Atlánticu.

Discos de música tradicional y folk a la venta na tienda