La Conseyería de Cultura, Política Llingüística y Deporte ta acabante de convocar una nueva edición del Premiu Camaretá al Meyor Cantar y el Premiu Obdulia Álvarez ‘La Busdonga’ d’Asturianada. Del 2 d’abril al 2 de mayu ta abiertu plazu pa presentar propuestes al ‘Camaretá’ y del 23 de marzu al 21 d’abril pa ‘La Busdonga’.
El Premiu Camaretá reconoz tolos años con 6.000 € un cantar de cualesquier xéneru con lletra orixinal escrita n’asturianu o gallego-asturianu, tengan o non una melodía de composición propia. Pueden presentase mesmo artistes solistes que grupos, faciendo constar l’autoría del testu. Les propuestes finalistes van actuar en directo nuna gala pública y retresmitida na RTPA. Pueden consultase les bases na resolución del BOPA.
Per otru llau, el Premiu Obdulia Álvarez ‘La Busdonga’ d’Asturianada ye una reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial nel 2015. El certame organízase en tres categoríes: femenina, premiada con 6.000 €; masculina, 6.000 €; y moza, con 3.000 €. Pueden presentase toles persones que quedaren seleccionaes ente les seis meyores clasificaes de los concursos llocales «Ciudá de Llangréu», «Ciudad de Oviedo», «Conceyu Siero», «El Comercio», «Valle del Narcea», «Valles d’Ayer» o «Villa de la Avellana». Les bases apaecen publicaes nesta resolución del BOPA.
Suscríbite a les nuestres novedaes
