El son nos cantares de boda Vol. I ye’l primer trabayu del tríu nosOtrestres, formáu por Laura Ruiz, Mónica Vega y Candela Pidal, que yá pue sentise en toles plataformes musicales y mercase na tienda online de musicasturiana.com, na so oficina de Xixón y nel espaciu d’esti proyectu na tienda de Puru Remangu n’Uviéu.
El trabayu ta formáu por 17 pistes, siempre precedíes d’un fragmentu curtiu de la grabación orixinal. Nél pueden sentise dende sonoridaes más apegaes a la tradición bien con pandereta, panderos y voz o col acompañamientu d’una bandina, a arreglos más folkies como ‘«’La llegada a la casa nueva’»’, con guitarres y baxu eléctricu.
Estos sones de boda grabaos nos Estudios 15:40, cunten amás de cola participación del propiu técnicu d’esa casa, Senén Fernández, cola de diversos músicos del panorama de la música tradicional d’Asturies como Fabián Fernández a la gaita, Susana de la Cruz a la flauta, Nel Sánchez a l’acordión, Antón Barquero y Arsenio Ruíz a les percusiones o Guadalupe Villanueva, Lorena Álvarez y Yolanda Menéndez al panderu.
Esti proyectu de nosOtrestres naz tamién del trabayu de campu del etnógrafu y mayestru, Fernando de la Puente Hevia, como principal compilador de la mayoría de los cantares, sacantes el ‘Tributo a Pandereteres de Fitoria’, sobre la melodía que-yos cantara Obdulia de Bimeda (Cangas) a Ambás y Ramsés y que vien polo tanto del Archivu de la Tradición Oral d’Ambás (ATOAM) y ‘La Buena Pro’ -tamién nomáu pol incipit ‘Después que la han comido’-, recoyíu nel añu 52 pol investigador americanu Alan Lomax n’Arenas (Cabrales).
El trabayu discográficu estructúrase siguiendo’l trescurrir de la celebración d’un casoriu, faciendo agrupaciones temátiques y poniendo enfásis nos personaxes que participan nel eventu. Asina, les cinco situaciones temporales que se contemplen son la ‘Llegada de las compañeras’, el ‘Camino a la iglesia’, la ‘Salutación a los recién casados’, el ‘Camino de la casa’ y ‘El transcurso del banquete’; caúna d’elles con temes asociaos, por les referencies nos sos testos, a distintes figures como la novia, los convidaos, los padrinos o la suegra.
El soporte físicu del álbum, diseñáu por Antón Barquero, sigue’l formatu denomináu Digipack USB e inclúi un llibretu nel que apaez esta clasificación y toles lletres recopilaes, amás d’una memoria USB na que se puen atopar tolos temes.
Suscríbite a les nuestres novedaes
