«Yo soi fía, nieta, sobrina, compañera de clase… de mineros ¿Por qué nun toi cantando cantares de mineros y de la clase obrera en xeneral? Si ser clase obrera ye lo más». Esta foi la reflexón a la que llegó Mapi Quintana cuando vio per primer vez la camiseta Asturies Working Class de Puru Remangu. A partir d’ehí entamó a preparar un repertoriu con esta temática en compañía de Rubén Bada. El resultáu va vese’l próximu sábadu 15 de marzu, a les 18.30h nel Pozu Santa Bárbara de Turón (Mieres). Les entraes salieron güei a les 13h y a les 13.05h yá s’agotaron.
L’espectáculu nuevu que firma esta artista enmarcada dientro de la escena tradicional y jazz xunto col reputáu músicu Rubén Bada ye, como presenta’l Conceyu Mieres «una fiesta del arguyu obreru, un percorríu pola cultura, la música y les canciones de la clase trabayadora nun conciertu emocionante, especial y únicu«. Nesti sen, el repertoriu va tar formáu por temes americanos -de Mercedes Sosa, Chico Buarque, Rubén Blades, Pedro Aznar…-; una ‘Suite de la Cuenca’ inspirada en Nuberu; y, quiciabes, dalguna sorpresa más. Mesmamente, va unos meses Quintana declaraba a Musicasturiana.com que-y prestaría cuntar les histories de so pá «cuando andaba corriendo delantre la Guardia Civil nes manifestaciones de los años 80», daqué «mui común en munches cases de Cuenca».
L’estrenu va ser nel PZSB (Pozu Santa Bárbara), en Turón, un vieyu espaciu industrial reconvertíu pa la cultura. L’actividá cunta col sofitu de Mieres Cultura y les entraes, anque gratuites, tán llendaes a la capacidá d’aforu. Cola puesta en marcha d’esta obra, Mapi Quintana y Rubén Bada ponen enriba les tables una vegada más la conciencia de clase de quien son unos trabayadores de la industria cultural.
Suscríbite a les nuestres novedaes
