La música tradicional asturiana sonó la selmana pasada nel País Vascu gracies al intercambiu musical y cultural entamáu pola Errenteriako Herri Arte Eskola en collaboración coles Escueles de Música Tradicional d’El Ventolín (Siero) y Fitoria (Uviéu). Laura Ruiz -pandereta, voz, baille y danza-, Nel Sánchez -curdión-, Arsenio Ruiz -tambor- y Guillermo Pérez -gaita- foron convidaos por Beñat Ralla Yusta a participar nesti intercambiu pedagóxicu y cultural qu’entamó yá nel mes de marzu y que finó la so segunda etapa con dos conciertos el xueves 20 n’Hernani y el domingu 22 nel festival Atlantikaldia d’Errenteria.
Esti proyectu intercultural -nel que yá participaron entidaes de Cataluña, Galicia y Gales- ta plantegáu en delles etapes. La primer d’elles foi en marzu, cuando la delegación asturiana viaxó hasta Errenteria pa trabayar nel repertoriu y nos arreglos xunto al profesoráu d’ellí. Nesa ocasión, amás, los profesores amosaron los instrumentos y baille tradicionales nun conciertu didácticu y delles clases. Dende’l xueves de la selmana pasada, la iniciativa abrió una segunda fase de los alcuentros con más interrellación ente les escueles y l’alumnáu col envís de preparar los dos conciertos del fin de selmana, nos que participaron 40 músicos y 35 danzantes.
N’Hernani y nel Atlantikaldia sonaron temes tradicionales asturianos que los cuatro músicos asturianos interpreten davezu nel espectáculu Tradicionando: «Añada», «Danza de Santana», «Jota y Gallegada», «Muñeira de Suroccidente» y «Saltón». Laura Ruiz, Nel Sánchez, Arsenio Ruiz y Guillermo Pérez dedicaron tamién la mañana del vienres a la grabación d’estes melodíes pal archivu de la Errenteriako Erri Arte Eskola. L’asturianu tamién foi parte del intercambiu y tuvo presente na llectura del poema Ítaca de Kavafis na voz de la panderetera de Fitoria. «Queremos destacar la bona acoyida que tuvimos los profesores n’Errenteria, la curiosidá polos nuestros cantares y instrumentos, y la profesionalidá de toles persones que topamos nestos díes d’estancia ellí», apunta Laura.
Próxima parada: Selmana del Folklore Astur
La Pola Siero va acoyer l’últimu alcuentru d’esti interesante intercambiu coincidiendo cola XLIII Semana del Folklore Astur entamada pol GFI El Ventolín na selmana de los Güevos Pintos -dende’l 21 al 26 d’abril de 2025-. L’alumnáu de dambes escueles de música tradicional asturianes -El Ventolín y Fitoria- van poder esfrutar de la estancia de la delegación vasca con ensayos, conciertos y otres actividaes entá por confirmar nes que van participar al rodiu de 65 persones. El conciertu de pieslle va ser el sábadu 26 d’abril. Laura Ruiz espera la visita de la Erri Arte Eskola d’Errenteria «con gana de que vengan y presentar a los nuestros alumnos el folclor vascu y la bona mestura de dambos».
Suscríbite a les nuestres novedaes
