Dende esta selmana yá ta disponible en toles plataformes musicales Al bellume la biesca, el discu qu’editó el desapaecíu grupu de música celta asturiana Cuerria col sellu Fono Astur en 1999. Cola dixitalización d’esti trabayu por parte de Musicasturiana.com, el patrimoniu musical asturianu sigue espardiéndose per tolos países del mundu.
Cuerria nació n’Infiestu nel añu 1996 pola unión de varios aficionaos del conceyu a la música celta. Esi mesmu añu participaron nel concursu de folk Sur Jerez algamando’l segundu puestu. Tres dellos cambios y la incorporación de nuevos miembros nel branu de 1997 -toos ellos piloñeses-, la formación completóse dafechu en 1998. Nesi tiempu, actuaron nos principales eventos de música folk d’Asturies y alredores.
La primer maqueta -grabada nos estudios de La Felguera- llegó en 1999 pa dar a conocer el so llabor en formatu CD. En payares grabaron el so primer y únicu trabayu discográficu col sellu Fono Astur nel estudiu de Pedro Bastarrica. La presentación foi nel Teatru Campoamor d’Uviéu, entamando una xira pelos escenarios d’Asturies: Teatru Xovellanos, Noite Celta de Porcia, Festival Intercélticu d’Avilés y otros. Tamién amosaron el so trabayu n’alcuentros de música del xéneru d’otros territorios -Las Médulas de Llión (convidaos por Radio 3), sala Clamores de Madrid- y participaron en programes de radio como’l d’Aurelio Argel. Nel branu del 2000 representaron a Asturies nel Festival Intercélticu de Lorient y siguieron n’activu hasta mediaos del añu 2001, cuando se disolvieron definitivamente.
25 años del discu
El grupu piloñés tocó abondo repertoriu vocal, interpretáu poles voces de Cecilia Allende Valle (voz y baxu acústicu) y José María Aladro Montañés (voz, guitarra y mandolina), xunto a potentes bases instrumentales y rítmiques feches con variedá d’instrumentos: bodhran, tambor y otres percusiones tradicionales de Pablo Pumarada Zarabozo; gaita, xiblata y whistles con Jordi Fernández Boltá; gaita, vigulín y percusiones de José Ángel García Fernández; el pianu de Carlos Díaz; y la curdión cromática y harmónica d’Aitor Miyares Rubio. El repertoriu axuntaba melodíes tradicionales asturianes, pieces d’otros países del Arcu Atlánticu, temes vocales y instrumentales, y dalgunes composiciones propies. Toles interpretaciones tienen un soníu instrumental y vocal característicu y propiu.
Al bellume la biesca vendió 3000 copies, a nivel llocal mayoritariamente, un fenómenu irrepetible nel conceyu de Piloña. Anguaño, la mayor parte de los componentes de Cuerria continúen n’activu mesmo n’otres agrupaciones amateur que dedicándose profesionalmente a la música. Esti mes de payares cúmplense 25 años de la edición d’esti trabayu que yá forma parte de la historia de la música asturiana.
Suscríbite a les nuestres novedaes
