A finales d’ochobre presentóse a traviés de les redes sociales L.lueñe, un tríu de música tradicional formáu por trés persones mui destacaes dientro d’esta escena: Alba Gutiérrez (voz y percusiones), David Varela (acordión, percusiones y voz) y Adrián Argüelles (flauta travesera y gaita). Esti sábadu 8 de payares a les 22.30h, dientro de la XXII Seronda d’Avilés, va ser la primer oportunidá de velos en directo nun conciertu que «animó» al surdimientu d’esta formación.
«Dempués de cuasi diez años de silenciu creativu, en payares de 2024 entré a formar parte de Corquiéu como vocalista. Realcontrame con numberosos compañeros que m’animaron a volver a trabayar na música y tamién la llamada d’Escontra’l Raigañu pa facer esti conciertu na Seronda, foi que los nos animó a preparar un conciertu especial pa esti momentu y a que’l proyectu de L.lueñe naciera», comenta Alba Gutiérrez, al rodiu’l surdimientu d’esti tríu.
«La torna a’alcordanza y a la infancia» son otres de les razones qu’hai tres de L.lueñe, un nome que tien muncho que ver cola memoria del tiempu pasáu. Asina ye como Gutiérrez desplica que «la vuelta al pueblu y a los oríxenes; a la pandereta, al raigañu; son la matriz d’esti trabayu musical». Pa ello trabayen con un «repertoriu de tol cordal» formáu por pieces tradicionales que «significaron daqué especial» pa la vocalista dientro de los sos 30 años de trayectoria nel mundu de la música de raigañu. A too esto hai qu’añadi-y una estética al estilu de les orquestines de principios del sieglu XX.
Amás del conciertu d’esti vienres, el tríu tien intención de siguir presentando’l proyectu notres programaciones y «poder siguir trabayando». «Prestónos muncho’l resultáu y la idea ye siguir alantre cola propuesta«, comenta la cabezalera de la formación, que tamién afirma que tamién tienen «dalguna idea» pa grabar la so música nel estudiu anque tovía tán «viendo l’enfoque».
Anque’l grupu ye nuevu, los sos componentes son vieyos conocíos nel ámbitu de la música tradicional. Alba Gutiérrez ye ún de los máximos exponentes del folk cántabru y lleva dende los 4 años colos instrumentos na mano. Tien dellos de los gallardones más importantes de música tradicional de Cantabria, tien tocao con artistes como Xabier Díaz, Eliseo Parra, Xosé Manuel Budiño o Kepa Junkera, ye profesora de cantu y percusión y vivir en Cantabria, Asturies y Galicia dio-y munches esperiencies nes músiques de raigañu qu’agora tresllada a L.lueñe.
Xunto a ella tán David Varela, multiinstrumentista que tien participao nun montonera de trabayos discográficos, proyectos teatrales y propuestes empobinaes pa la reciella; y Adrián Argüelles, fundador de la bandina La Garrapiella y d’Entós, amás de tener tocao notres agrupaciones como la Banda Gaites Camín de Fierro o Fesoria a Les Ortigues. Trés nomes esperimentaos qu’esti sábadu na Plaza Les Aceñes d’Avilés van amosar el so facer xuntos.
Suscríbite a les nuestres novedaes
