El sábadu pasáu Cimavilla acoyó la primer Batalla de canciones n’asturianu, eventu pa puxar pola música n’asturianu fecha por xente d’ente 14 y 35 años. Un total de seis artistes participaron nesti certame pioneru empobináu a esparder la llingua asturiana ente les xeneraciones más nueves. Yá pue vese en YouTube’l videu completu d’esti eventu que supunxo la vez que más propuestes de rap n’asturianu pudieron sentise enriba d’un escenariu na historia d’esti xéneru n’Asturies. Ferla Megía, Nahasa y Pau y Manu foron los ganadores.
L’artista multidisciplinar Ferla Megía foi’l primeru en garrar el micrófonu na pista poliderpotiva de Cimavilla, cola interpretación de dos temes nuevos: ún fechu namás cola vocal ‘e’ y un a capella nel que la lletra yera la mesma, pero camudaba de xacíu dependiendo de cómo se recitara. Darréu foi’l turnu del más mozu de toos, DJPaulo14, de namás 20 años. Cantó les pieces que tien publicaes na so canal de YouTube ‘Cabranes ye lluz y bruma‘ y ‘Nesi silenciu‘. El siguiente foi Gonza con un reivindicativu cantar de rap melódicu qu’interpretó dos vegaes: con base y tamién n’a capella.
Tres de los primeros raperos, foi’l turnu de les muyeres y del spoken word, xéneru qu’entemez poesía narrada y música. Mar foi la primera en xubir al escenariu con dos cuidaos poemes nos que la crítica social tamién taba bien presente nel mensaxe y darréu d’ella actuaron Pau y Manu; ella a la voz y él cola guitarra pa da-y forma a dos poemes musicaos de calter intimista.
La última actuación cuasi nun se produz. Ye un reflexu de la diglosia existente na sociedá asturiana, como bien sorrayó Alma Hidalgo, presentadora del eventu. Foi la de Nahasa, raperu de la Cuenca’l Nalón que, anque usa l’amestáu como forma d’espresión natural al falar, reconocía que tenía dificultaes pa componer n’asturianu y que diba echase patrás nel concursu. Sicasí, lo que fizo finalmente foi interpretar dos de los sos temes tornaos al asturianu, cumpliendo asina esta Batalla de canciones n’asturianu ún de los sos oxetivos: animar a la mocedá a perder el mieu a cantar n’asturianu.
Tres d’estes actuaciones cantó un tema Tori de K-Nalón, ún de los pioneros en facer rap n’asturianu, y otru Cebé, mayestru d’asturianu, miembru del xuráu y tamién raperu que fizo un a capella. Mentanto, el resto’l xuráu formáu por Claudia Llera, presidenta del CMPA; Enar Areces, responsable de Puru Remangu; el raperu Arma X; y la filóloga Elena Álvarez; ponía en común les sos votaciones. Escoyeron Ferla Megía, Pau y Manu y Nahasa pa que pasaren a la segunda ronda, na que tuvieron qu’interpretar caún una pieza más.
Finalmente Ferla Megía algamó’l primer premiu (300 € y distribución dixital con musicasturiana.com), Nahasa’l segundu (200 € y un productu de Puru Remangu) y Pau y Manu’l terceru (100 € y otros 100 € pa gastar na tienda Distrito Rojo). Zarrábase asina la primer Batalla de canciones n’asturianu, eventu entamáu pol Conseyu de la Mocedá de Xixón (CMX), la Oficina de Normalización de Llingüística de Xixón y @hhopcast -proyectu dinamizador del hiphop n’Asturies-, que dio orixinalidá, frescura y públicos nuevos a les iniciatives desendolcaes pa normalizar l’idioma ente la mocedá asturiano.
Suscríbite a les nuestres novedaes
