Nel añu 1997 Dixebra cumplía’l so décimu aniversariu y yá yera una banda consolidada y reconocida n’Asturies. Trescurriera un tiempu nel que percorrieren bona parte de la xeografía asturiana, actuando en nueches celtes, fiestes populares, festivales solidarios, sales y eventos musicales de gran formatu; teníen salío a otros llugares del Estáu y taben a piques d’escomenzar a dase a conocer nel restu d’Europa. Hasta aquel momentu publicaren cuatro discos: Grieska (1990), Asturies o trabayes (1993), Apúntate a la llista (1995) y Dieron en duru (1997), conteniendo temes que diben facese clásicos dientro del so repertoriu.
Pa conmemorar aquella primer década d’actividá la mesma banda entamó un conciertu-espectáculu nel Polígonu Deportivu de Les Vegues (Corvera), onde asitiaron una carpa a costa fecha pa ello. Ellí, los mil asistentes, pudieron disfrutar de dos hores d’actuación, cola participación de la Banda de Gaites Tabladar d’Avilés, dirixida polos hermanos Tejedor ―yera de les primeres veces qu’una d’estes formaciones xubía a un escenariu con una banda de rock―, Tina Cuadriello (acordionista de Balandrán), Antón Barquero (percusionista de Balandrán), Ángel Ruíz (banjista de Skitarna) y una sección de vientu completa (trompeta, saxo y trombón), ―que pasaría a facer parte de la instrumentación de la banda de siguío―.
Fuera del aspectu musical rescamplaba pa presencia de la compañía de teatru Tres Ruedes, que representaron dellos sketches y performances, los Sidros de Valdesoto ―daquella taben inactivos y foi una oportunidá única de poder velos―, el colectivu videográficu Bebés Furiosos, que s’encargaron de les proyecciones, y un grafiteru que foi pintando una estrella de cinco puntes nel trescursu del conciertu; amás dello, el responsable de los samplers foi’l productor Sergio Rodríguez (Tutu), que los llanzó a lo llargo de tol conciertu.
L’ambiente xeneráu foi de folixa y reivindicación, con glayíos del públicu constantes y bailles y pogos multitudinarios, dando acabación al espectáculu con una traca de petardos y pequeños fueos artificiales. La fecha escoyida, 22 de payares, según se recoyía nel pasquín de promoción del conciertu, nun yera casual: «…yá que nella los antiguos celtes celebraben la denomada Fiesta del Samain, considerada como la más importante de les celebraciones folixeres céltiques. Siendo una especie d’Añu Nuevu onde’l branu aportaba definitivamente a la so fin y escomenzaben los meses escuros».
La grabación que presentamos agora nel Archivu de la Música Contemporánea Asturiana (AMCA) nunca enantes viere la lluz, nin siquiera de manera parcial, y magar les deficiencies de soníu constitúi un documentu de primer nivel, polo que supón pa conocer la primer época de Dixebra. Acompañámosla con una amuesa fotográfica fecha por Xurde Margaride, que recueye bona parte de lo asocedío naquella nueche.
Suscríbite a les nuestres novedaes
Un comentario
que guapo ! un saludo !