Col branu y la temporada alta de festivales y eventos averándose, los grupos de la escena tradicional y folk entamen a dar anuncia de los sos próximos conciertos. Güei falamos de les nueves feches de Corquiéu, Guieldu, Entós, 6 Riales y Picarós.
Corquiéu, que retomó’l so andar a finales del añu pasáu, coles incorporaciones de Celia Nieto al vigulín y Alba Gutiérrez a la voz, tocarán el 20 de xunu nel Folkomillas (Comillas, Cantabria), el 28 de xunu nel Zarréu Fest, y el 5 de xunetu na IV Nueche Celta d’El Puntal
Guieldu, col so discu publicáu va unos meses, tamién tarán presentes nel Folkomillas, el 20 de xunu, y serán amás ún de los grupos que dirán esti añu pal Festival Interceltique de Lorient, onde tocarán el 3 d’agostu. A la vuelta, y casi sin descansu, van tar el 6 d’agostu nel Festival Folk-Rock Nas Portelas (Lubián, Zamora). A estes feches súmense otres dos, inda por anunciar el llugar, el 31 de xunetu (Llión) y el 20 de setiembre (Asturies).
Entós, que foi ún de los nuevos grupos que se dieron a conocer esti añu presentando el so EP homónimu, tienen a la vista seis feches pa percorrer la xeografía asturiana, incluso salir fuera: El 5 de xunu nel PerSé (Uviéu) y el 14 de xunu en Taberna Narciso (Teberga), pa dempués compartir escenariu colos dos grupos anteriores nel Folkomillas, el 22 de xunu. Al día siguiente, 23 de xunu, tarán en Nava, pa cellebrar San Xuan. El 31 de xunetu toca en Xixón, nel Arcu Atlánticu, y el 8 d’agostu, nel Festival Intercéltico D’Occidente (FIDO)
6 Riales nun paren. Tres incorporar esti añu a Elena Granda Infiesta, tovía tienen pendientes 7 de les 14 feches qu’anunciaron pa esti añu: el día 20 de xunu… sí, tamién pa Folkomillas. El 11 de xunetu n’El Primer Peregrino, n’Uviéu, el 26 de xunetu nes Fiestes de Ciares (Xixón), pa dempués baxar el 9 d’agostu pal Planeta Folk (San Pedro de Gaíllos, Segovia). El 15 d’agostu van tar en Muniellos, en La Bruxa de Muniellos, y’l 31 d’agostu nes fiestes de La Regalina, en Cadavéu. Finen la xira en Piedras Blancas el 13 de setiembre.
Picarós siguen cola xira presentando’l so discu Son d’Ermu. Podrán sentise’l 4 de xunu nos Alcuentros de Músiques Asturianes de Xixón, el 14 de xunu en Almedinilla (Córdoba), y el 21 de xunu na Figal de Xugabolos, en Salas. Pasando al mes siguente, tamién van tar el 5 de xunetu na Nueche Celta d’El Puntal, el 11 de xunetu presentando’l discu nel Teatro Trubia, y tienen un eventu más por anunciar que sedrá el 12 de xunetu en Cantabria. Avanzando pel calendariu, el día 3 d’agostu van tocar nel Kuivi Plaza (Uviéu), el 9 d’agostu nel Festival Internacional de bandes de gaites Villa de Xixón, y el 17 d’agostu en Monterrubio (Segovia). Finando’l branu, tienen un eventu por anunciar n’Asturies el 20 de setiembre y tarán en Teverga el 27 de setiembre.
Suscríbite a les nuestres novedaes
