Editorial: «Carta político-musical a Aliatar»

Cola entrada del añu nuevu, unos presupuestos p’Asturies aprobaos con ampliu consensu y l’arranque d’una llexislatura nueva, toca da-y a Aliatar la carta colos nuestros deseos pa que-y la entregue a estos tres reis magos que muncho tienen que pintar en materia de desarrollu cultural: Alministración Pública, Empreses Privaes y Sector Musical. Por nun estendenos, que’l mensaxeru tien muncha reciella qu’atender, podemos resumir dalgunes de les coses poles que pruyimos:

«Hai tres reis magos que muncho tienen que pintar en materia de desarrollu cultural: Alministración Pública, Empreses Privaes y Sector Musical»

Al Rei de l’Alministración Pública:

Reorientar les polítiques públiques en materia cultural -y musical- pa responder al descontentu xeneralizáu del sector, tal y como se sintió na comparecencia celebrada na Xunta Xeneral el pasáu avientu. Anque se tean dando yá dalgunos pasos amañosos, ye necesario siguir faciendo un camín que pue dir de lo más cenciello a lo más complexo tomando decisiones como estes:

  1. Adaptación de la web oficial de Cultura del Gobiernu del Principáu d’Asturies y la xestión de les sos redes sociales al añu 2024; pa tar asina al mesmu altor que les d’otres estayes del gobiernu asturianu o’l d’otres Comunidaes Autónomes y, a la par, construir un espaciu dixital útil pa profesionales y siguidores de la cultura’l país. 
  1. Reactivación de les meses sectoriales d’una forma planificada, participativa, coherente y ordenada; pa diseñar un Plan Estratéxicu de la Cultura Asturiana que permita desendolcar una política cultural ambiciosa, estable y que dea respuesta a les necesidaes reales del sector.
  1. En materia musical, desendolcar polítiques de creación de públicos; pa fomentar que la sociedá conoza la música asturiana y facer por que medre la so demanda y consumu. Tres claves nesti sen son la presencia digna y amplia nos medios de comunicación, la programación nos eventos festivos llocales y un mayor pesu en programes educativos.
  2. Creación d’una Axencia Asturiana d’Industries Culturales y Creatives como entidá pública que garantice polítiques afayadices y-yos dea estabilidá y continuidá nel tiempu.

«Lo que fai pola música gallega y euskaldun Gadis, Estrella Galicia, BBK Fundazioa o Kutxa Fundazioa, son exemplos que les grandes empreses asturianes y les sos fundaciones podríen siguir»

Al Rei de les Empreses Privaes:

Valorar a la cultura propia como una fonte de xeneración de riqueza, d’empléu y de cohesión social. Hai otres Comunidaes Autónomes onde’l sector priváu entiende esto asina y, a consecuencia, invierte parte de los sos beneficios en potenciar la cultura. Lo que fai pola música gallega la cadena de supermercaos Gadis o Estrella Galicia o pola música euskaldun fundaciones privaes como BBK Fundazioa o Kutxa Fundazioa, son exemplos que les grandes empreses asturianes y les sos fundaciones podríen siguir.

«Nun hai nenguna organización que represente d’una manera amplia y continua a los intereses industria musical, lo que nos dexa nuna situación de debilidá»

Al Rei del Sector Musical:

Pelear polos nuestros derechos d’una forma organizada. Dientro del sector cultural asturianu hai asociaciones qu’axunten a profesionales de la industria audiovisual, de les artes escéniques, de la danza, de la industria del videoxuegu, a les editoriales de llibros, a los y les traductores n’asturianu… Pero nun hai nenguna organización que represente d’una manera amplia y continua a los intereses industria musical, lo que nos dexa nuna situación de debilidá en comparación con otros subsectores. El pasáu 2023 creóse’l Conceyu de la Gaita y tamién dende Musicasturiana.com impulsamos acciones como les de dar respuesta  a traviés de Música n’asturianu SÍ a les amenaces que sufrió la música’l pais dende una parte del Ayuntamientu de Xixón o presentar a la Xunta Xeneral l’Informe sobre la necesidá d’apostar poles Industries Culturales y Creatives Asturianes. Sicasí, nun dexen de ser iniciatives más reducíes y nun responden a lo que debería ser un sector verdaderamente organizáu d’una manera amplia y con unos oxetivos estructuraos a comuña, como sí que pasa n’otros ámbitos.

Dicho esto y como nos portamos mui bien esti añu, naguamos porque los deseos tresmitíos a Aliatar, fáiganse realidá; llevamos décades esperando por ellos. 

Dexa un comentariu

X