El festival internacional Suns Europe, unu de los principales escaparates pa la música en llingües minorizaes d’Europa, tien yá abierta la so convocatoria pa la edición de 2026, que se va celebrar nel mes d’ochobre en Udine (Italia). El plazu pa presentar candidatures ta abiertu hasta’l 15 de xunetu.
La convocatoria ta dirixida a proyectos musicales —tanto bandes como solistes— que desarrollen la so actividá en llingües minorizaes, una condición que convierte esti certame nun espaciu especialmente interesante pa la escena asturiana.
Suns Europe, nacíu como un alcuentru ente comunidaes alpines y ampliáu dende 2015 a tol continente, tien como oxetivu visibilizar la creación contemporánea nes llingües propies d’Europa, apostando non pola tradición folclórica, sinón pola innovación y la evolución artística. Bandes asturianes que canten nes llingües d’Asturies —dende’l folk alternativu hasta’l rock, la electrónica o’l pop— podríen atopar equí una oportunidá pa dar el saltu a un circuitu internacional especializáu.
Les candidatures van ser evaluaes pol comité artísticu del festival, que va dar a conocer la so decisión en branu. Les propuestes escoyíes actuarán en directo na gala final del 10 d’ochobre n’Udine (Italia), nun formatu de concursu que supón una importante plataforma de visibilidá europea. N’ediciones anteriores, el festival contó cola presencia d’artistes d’otres escenes minorizaes como la vasca, lo que dexa ver el potencial que tendría una representación asturiana dientro del eventu. Les bandes interesaes pueden aplicar calcando equí.
Suscríbite a les nuestres novedaes
