Vuelve Xixón FEM Music, la iniciativa de la Fundación Municipal de Cultura, Educación y Universidá Popular (FMCEyUP) del Conceyu Xixón que tien l’envís de visibilizar la brecha de xéneru nel ámbitu de la música y desendolcar acciones p’ayudar a amenorgala. Tres la exitosa edición del pasáu añu, esti semilleru de bandes abre una nueva inscripción. Les muyeres interesaes pueden apuntase na web de la iniciativa enantes del 9 d’ochobre.
Ente ochobre de 2024 y xunu de 2025 desendolcóse la primer edición de Xixón FEM Music na que se crearon trés bandes formaes n’esclusiva por muyeres nesti proyectu tutorizáu por Mar Álvarez (Pauline en la Playa, Pop Piquiñín, Undershakers…), Sil Fernández (Delagua, Silvidos y Gemidos, Pablo Senator…) y Cris Montul (Pauline en la Playa, Girls to the Front, Donna y las Dinamos…). Pa esta temporada va proponese otra vegada crear trés grupos «acordies a los niveles, aptitudes, gustos musicales y instrumentos interpretaos poles solicitantes».
Les muyeres que participen na iniciativa van cuntar col llocal y l’equipu necesariu pa poder ensayar. Pa formar parte del proyectu pídese tener un nivel musical mínimu -y amosalo unviando audios o videos d’actuaciones en directo o executando dalgún tema-; tener más de 16 años; nun exercer enantes como música profesional; y tener disponibilidá y compromisu p’asistir a un ensayu selmanal. La duración total del proyectu va ser d’un mínimu de seis meses.
Pa visibilizar más Xixón FEM Music ta prevista la organización d’un conciertu-presentación del proyectu pal próximu sábadu 25 d’ochobre dende les 18h nel Centru Municipal Integráu d’El Llano. Nél van participar les músiques amateur y el grupu formáu poles tutores del proyectu.
Suscríbite a les nuestres novedaes
