Esti sábadu los Kuivi Almacenes d’Uviéu acueyen Xaréu. Folixa Moza, festival gratuitu entamáu pol Conseyu de la Mocedá del Principáu d’Asturies (CMPA) pa festexar 40 años d’actividá. Dende les 16.30h hasta les 20.30h va haber xuegos tradicionales y dos talleres: ún de pandereta y baille al cargu del Grupu Folclóricu Prau Llerón y otru de pinchadiscos de DJ La Güeriata -que va poner el ramu con una sesión hasta les 2 de la madrugada-. Pa les 21h entamen los conciertos con Algaire y, a les 22.30h, l’estrenu de mecameca, un proyectu conxuntu ente Llevólu’l Sumiciu y Ferla Megía, los dos nomes con más sonadía de la música nueva asturiana. Esti últimu cunta más detalles de la iniciativa.
¿Qué ye mecameca y qué vais interpretar el sábadu?
Ye un proyectu collaborativu nel que Pablo va interpretar cantares míos, pero col toque de Llevólu’l Sumiciu y yo voi interpetar temes d’ellos, pero col mi estilu. O sea, que va ser un Live Set, onde tamién va haber apaiciones estelares. Son cantares que la xente conoz, pero que nunca sintiera d’esta manera.
«Pablo va interpretar cantares míos, pero col toque de Llevólu’l Sumiciu y yo voi interpetar temes d’ellos, pero col mi estilu. Tamién va haber apaiciones estelares. Son cantares que la xente conoz, pero que nunca sintiera d’esta manera»
¿Cómo surdió la idea?
Los dos proyectos somos colegues dende va tiempu y siempre conectamos perbién a nivel musical. Cuando nos ufrieron tocar na fiesta del Conseyu de la Mocedá ocurriósenos facelo xuntos por vez primera, en cuenta de por separáu, como ficimos hasta agora. Amás, pensamos que tendría que tener un nome distintu, porque nun ye ni una cosa ni la otra. Tamién teníemos referencies mutues, onde varios artistes d’electrónica xuntábense pa tocar en directo xuntos; compartimos muncha inspiración y eso fai que too seya mui cenciellu.
¿Por qué esi nome?
mecameca ocurriósenos imaxinándonos lo que diría la xente cuando s’enterase de la nuestra xuntanza. En plan: «meca meca que toquen xuntos!!»
«Pensamos que tendría que tener un nome distintu, porque nun ye ni una cosa ni la otra. Tamién teníemos referencies mutues, onde varios artistes d’electrónica xuntábense pa tocar en directo xuntos; compartimos muncha inspiración y eso fai que too seya mui cenciellu»
¿Cómo tán siendo los ensayos de mecameca?
Pues como Pablo vive en Barcelona, eso lo complica un poco, pero les veces que nos xuntamos para trabayar con vistes a esti proyectu nuevo foi tan fácil y tan orgánico, que nun nos fai falta ensayar pa que suene cañón.
¿Amás de lo d’esti sábadu va haber más conciertos xuntos?
Esto ye de xuru l’entamu de dalgo más grande.
Suscríbite a les nuestres novedaes
