Esta mañana presentóse na sede de Presidencia n’Uviéu ‘Marcha de Brañes (Remestura)‘, una cuidada reinterpretación que l’artista sierense Ferla Megía fai d’esti tema perconocíu del veteranu gaiteru Xuacu Amieva. La iniciativa surde a petición del propiu gobiernu asturianu que, a traviés de l’axencia Neozink, encargó una pieza musical pa poner banda sonora al Día de la Bandera que se va celebrar el próximu 25 de mayu.
«L’oxetivu del proyectu ye crear una composición interxeneracional pa conmemorar un fechu históricu de gran relevancia pal Principáu, nel qu’Asturies fizo que se sintiera’l so clamor en tol país», comenten dende’l gobiernu asturianu. Precisamente, Adrián Barbón aconceyó esta mañana Megía y Amieva pa sentir el tema que va servir pa facer alcordanza del «llevantamientu de la Xunta Xeneral contra la invasión francesa de 1808, acontecimientu que dio orixe a la bandera asturiana«.
Na remestura de la ‘Marcha de Brañes’ caltiénse la esencia tradicional de la composición de Xuacu Amieva y a ella súmense les sonoridaes electróniques que-y da Ferla Megía na so xera de productor. Con un entamu más ambiental -cercanu al trip-hop-, la pieza va garrando puxu al mecese con un ritmu de reggaeton y acaba restallando a güelpe de drum&bass. D’esta manera, según les pallabres del gobiernu d’Asturies, el tema «incorpora’l particular universu sonoru de Megía ensin perder la esencia primixenia de la gaita d’Amieva«.
El tema suena nel videu de la campaña pa promocionar el Día de la Bandera nes redes sociales y tamién sonar nel actu de conmemoración que per quintu añu consecutivu entama’l gobiernu asturianu pa festexar el 25 de mayu. Pa celebralo va programase un actu institucional nel palaciu de los Condes de Toreno d’Uviéu del que haber más información próximamente.
Suscríbite a les nuestres novedaes
