Esta tarde conocióse la muerte a los 55 años d’edá de Fran Gayo, persona mui destacada dientro de la cultura d’Asturies pol so llabor como músicu, escritor y, sobre manera, por ser programador de festivales de cine como’l FICX de Xixón, l’OUFF d’Ourense o’l BAFICI de Buenos Aires. Nel so llabor como músicu, foi tou un pioneru al participar en Cambaral y Mus, dos formaciones que supunxeron una renovación sonora en rellación a tolo que se taba faciendo n’asturianu nel so momentu.
Mus foi un grupu únicu na música asturiana. El dúu formáu por Fran Gayo y Mónica Vacas tuvo n’activo dende 1997 hasta 2007, una década na que publicaron cuatro trabayos discográficos. El so estilu bebe del pop independiente, de la electrónica más sele y del folk, con unes lletres enmarcaes na realidá cultural y social d’Asturies. Algamaron el reconocimientu de la crítica especializada d’ámbitu estatal y llegaron a actuar en países como Taiwan, Rusia o Estaos Uníos; too ello con un repertoriu cantáu n’asturianu dafechu.
Per otru llau, Cambaral foi una banda qu’entemecía folk, rock, rap, blues, pop… y que compartieron con Tuluergu’l compilatoriu Nuevu Folk Asturianu, Vol.1, la que foi la primer referencia de Discos L’Aguañaz. El director d’esti sellu, Xune Elipe, califocólos de «provocadores y inclasificables, incomprendíos nel so momentu, pero que güei son una referencia«. En 1994 asoleyaron el so únicu discu Batulax, con una mestura de soníos ente los que s’inclúi un tema como ‘Denotabazío‘, cantar qu’axunta rap, rock, funk y folk con una lletra qu’amosaba perbién la so orixinalidá y frescura.
Dende MUSICASTURIANA.COM llamentamos la perda d’esta persona tan avanzada y fundamental pa la cultura contemporánea del país, mesmo dende’l cine, que dende la lliteratura y la música.
Suscríbite a les nuestres novedaes
