El multiinstrumentista y cantador Héctor Braga va poner en pie esti sábadu 17 d’agostu un espectáculu de preestrenu del so próximu discu de folk celta, Rabil, que va asoleyar enantes de que fine l’añu. La cita ye a les 20h n’Arenas de Cabrales. Nel escenariu, amás d’Héctor Braga, van actuar Javier Blanco a los teclaos y programaciones, Moi Suárez a la guitarra, el percusionista Simón San José, Luis Álvarez Pola a la gaita y la xiblata, y la Banda Banda Gaites Picos d’Europa Dop Cabrales.
Dempués d’espublizar l’adelantu «Llobatu» n’avientu de 2023 y «Valiente» -xunto a Víctor Manuel- n’abril d’esti añu, el proyectu de Rabil toma forma con esti conciertu de presentación de tolos temes nuevos del discu nun formatu anovador. Nesti octavu trabayu d’Héctor Braga, producíu por Javier Blanco, destaca’l protagonismu de la gaita rabil y la viola tecles, tal y como comentaba’l músicu nuna entrevista a Musicasturiana.com: «Vais topar música mui virtuosa, folk celta cola gaita rabil como filu conductor. Diríate qu’apaezo como’l «Hurdy Gurdy Man» del cantar de Donovan, ufriendo cantares d’amor, d’épica y mitoloxía ente vertixinoses melodíes folkies». Esti sábadu, ye la oportunidá pa ver el so preestrenu en directo.
Suscríbite a les nuestres novedaes
