El chigre L’Esperteyu d’Uviéu acoyó ayer per primer vegada la Semando Folk Session, una iniciativa de Musicasturiana.com y Ixuxú Cultura -dientro de la programación del Semando Fest- p’animar a xente mozo a tocar en comuña. A lo llargo de más de tres hores más d’una quincena d’instrumentistes xóvenes tuvieron tocando, baillando y cantando un repertoriu asturianu dafechu.
Vigulines, panderetes, flautes, panderos, bouzuki, curdión, guitarres, una uileann pipe y hasta una melódica sonaron nesti espaciu con una mayoría de músiques muyeres y onde la media d’edá rondaba los 25 años. Ente los temes interpretaos, sonaron pieces del repertoriu tradicional, amás d’otros cantares de grupos como Felpeyu o L-R.
Con esta actividá Musicasturiana.com dio arranque al III Semando Fest, el festival de música moza n’asturianu que se celebra güei a les 21h en Lata de Zinc coles actuaciones d’Abéu, Ferla Megía, Alienda y Melandru y toles entraes escosaes.
Suscríbite a les nuestres novedaes
