La Tarrancha ye ún de los grupos de rock n’asturianu que con más regularidá asoleyen llanzamientos. Los últimos fueron en 2024, añu en que publicaron l’álbum en directo Camín de Venti y el single audiovisual ‘Pela Carretera‘. Agora la banda ska-fusión anuncia que la selmana viniente entren nos Tutu Estudios pa grabar dos temes nuevos; ún d’ellos con videoclip que va tener un calter participativu. Tamién van collaborar con Mostru l’Horru nel discu nuevu nel qu’anda trabayando.
«Aires punk, dalguna pincelada de reggae y l’estilu personal ‘Mecigayu ska‘», asina avanza esta veterana formación los soníos que van tar presentes nesta grabación. «La idea ye mangar los temes a la rede y más palantre dir grabando otres canciones para faer lo mesmo», desplicó’l grupu na nota prensa unviada, na que tamién comenten otra de les novedaes: «ún de los temes va vese materializáu en videoclip y pa ello abrimos la puerta a la collaboración de la xente«.
«El cantar ye una invitación a tener presente a toes eses persones que vamos perdiendo pel camín: amigos, amigues, familiares, pareyes, xente del mundu la música… Polo que partimos de la idea d’usar simbólicamente, de forma un pocu velao, imáxenes d’esos seres queríos«, asina ye que La Tarrancha convida «a que tola xente que quieran unviar semeyes o ilustraciones d’eses persones puedan faelo«. Pue facese a traviés del corréu electrónicu latarrancha@hotmail.com. La realizadora sierense Leti Cienfuegos va ser la encargada de crear esta obra audiovisual.
Amás de los dos temes nuevos, La Tarrancha tamién anuncia que van grabar una collaboración pal próximu discu del raperu Mostru l’Horru. «La música foi compuesta pol productor y miembru de Mostru L’Horru, Yannick Gutiérrez, más conocíu como Zeros y que tamién ye ún de los técnicos de La Tarrancha», desplica la banda ska-fusión añadiendo qu’apurrieron nesti cantar «dellos arreglos a lo compuesto por Zeros: parte de la lletra, la instrumentalización y voz«.
Con estos proyectos nuevos el grupu continúa’l camín qu’entamaron a facer en 2003. Con un personal estilu, el mezigayu ska, o lo que ye lo mesmo, un amiestu de sones tan estremaos como’l ska, reggae, funk, balkan, punk o folk; La Tarrancha faen unos cantares baillables y festivos no musical; acompañaos d’un mensaxe reflexivu, críticu y divertíu a la par. La so propuesta pue sentise nos cuatro discos d’estudiu que tienen publicaos, nel so álbum en directo y nos sos enérxicos conciertos.
Suscríbite a les nuestres novedaes
