La mocedá del dúu Llevólu’l Sumiciu y la veteranía del grupu Dixebra vienen d’axuntase nun tema ellaboráu polos primeros, que remezcla en clave electrónica’l cantar que da títulu al últimu trabayu de los avilesinos. Con «Ente la niebla» abríase’l discu-llibru del mesmu títulu, que Dixebra publicaba na primavera del añu pasáu, una obra ambiciosa na que se cuenta y se canta la historia de llucha de les clases populares asturianes a lo llargo del últimu sieglu. Por eso güei asoleya esti cantar n’alcordanza del entamu de la Revolución d’Ochobre de 1934.
El tema d’apertura ye un resume de lo que pue alcontrase nel trescursu del discu: histories de compromisu, represión y solidaridá que marcaron al pueblu asturianu y fixéronlu ser como ye. Llevólu’l Sumiciu convierte una pieza de calter funk-rock con pingarates folk nun exerciciu d‘electrónica ambiental, tresportándolu a otru espaciu sonoru distintu dafechu. El dúu, orixinariu del conceyu de Castrillón, da-y una vuelta de 180 graos a la composición de Primi Abella (autor de la mesma y guitarrista de Dixebra), pa ello trabayaron coles abondoses pistes que tien la mesma, calteniendo namás íntegramente la voz orixinal.
Esta ye la primer collaboración ente estes dos formaciones y representa una muestra del dinamismu qu’anguaño tien la música asturiana, amás de la voluntá d’evolución y innovación presente nella.
Suscríbite a les nuestres novedaes
