El martes que vien arranca la segunda edición de Música en Rede. Alcuentru profesional, les xornaes dedicaes a la industria musical qu’entama la Conseyería de Cultura, Política Llingüística y Deporte a traviés de Cultura en Rede. Llaboral Ciudá de la Cultura de Xixón va acoyer del 8 al 10 d’abril esti eventu pal que yá se conoz tola programación formada por showcases, charres, talleres, alcuentros comerciales y presentación de proyectos. Xicu Ariza, responsable de Musicasturiana.com, va participar el miércoles 9 en dos de les actividaes programaes.
Entornos dixitales y música: fórmules de comunicación nueves ye la mesa d’alderique na que va participar Ariza xunto a los comunicadores y creadores de conteníos Arturo Paniagua (Radio 3, Los 40, La 2 de TVE o Movistar Plus) y Mer Gil (Estación Fetén). Esi mesmu día a les 15.15h va facer una presentación del proyectu SIENTI, la guía de musicasturiana.com y actualizar el so estáu y los próximos pasos que va dar.
Amás d’esto va haber otros siete coloquios: Ciudaes musicales y turismo musical: un futuru sostenible p’Asturies; Entornos dixitales y música: fórmules de comunicación nueves; Una asociación nueva de mánagers musicales pa España; Dende Asturies al mundu: 3 exemplos dende lo local; Propuestes metodolóxiques nueves pa la enseñanza musical; Música y autoxestión dende les periferies: failo tu mesmu, failo meyor; Sync y Licensing musical: oportunidaes na industria audiovisual y tres sesiones formatives: Celtic Connections & Festival Interceltique de Lorient: dos modelos d’éxitu; Financiamientu autonómicu pa la música n’Asturies; y DIY 101: Claves pa empezar cola autoxestión musical.
Ente los showcases (Llabor) tán confirmaes les siguientes propuestes artístiques venceyaes a la música n’asturianu: Llevólu’l Sumiciu, Vérsica, Vero Rubio, Alienda y Herbamora -tamién toquen otros proyectos que nun canten na llingua autóctona: De Fem, María Diaz, The Soulers, Blues&Decker, Marco Martínez Trío, Akin&The Afrobeat Brothers y Maimuny-. Toles actuaciones van ser de baldre y van facese de martes a xueves, ente les 18.30h y les 21.30h nel Paraninfu y nel Teatru de La Llaboral.
Amás d’esto va haber alcuentros comerciales (Xuntes) y les presentaciones curties (Rolda). Les presentaciones curties tán feches pa «captar l’interés de públicos estremaos, incluyendo asistentes al eventu, potenciales collaboradores, socios inversores, patrocinadores públicos…». Son ponencies de cinco minutos nes que pueden usase materiales d’apoyu y con elles náguase por que los y les ponentes «destaquen el valir artísticu, el potencial de mercáu y la capacidá de xenerar impactu cultural y económicu».
Per otru llau, les Xuntes son «alcuentros comerciales breves que s’entamen col enfotu de promover la conversación y l’asesoramientu ente asociaciones, empreses, artistes, programadores, xestores culturales, profesionales de la comunicación y managers pa favorecer la cooperación, l’intercambiu de conocimientos y el desendolcu de futures sinerxes dientro del sector».
Suscríbite a les nuestres novedaes
