La música asturiana tamién va tar presente nos actos más reivindicativos y institucionales de la Selmana de les Lletres Asturianes d’esti añu, con xeneros estremaos. La próxima movilización pola oficialidá del asturianu va contar con un destacáu componente musical de la mano del colectivu Nun tamos toes y el Coru Mineru de Turón va tar presente nel actu qu’entama l’Academia de la Llingua Asturiana.
Tres la manifestación del sábadu 9 de mayu, que va percorrer la cai Uría hasta rematar na Plaza La Escandalera d’Uviéu, el públicu va poder disfrutar de la actuación del grupu de música tradicional feminista Nun tamos toes. Trátase d’un conxuntu de muyeres que tienen como seña d’identidá l’usu de la pandereta y el panderu, amás de la creación de lletres nueves adaptaes a los tiempos y a les reivindicaciones actuales. Dende El Remediu, el grupu va ufiertar un repertoriu onde tradición y modernidá van dir de la mano, con pieces que busquen non solo la participación del públicu, sinón tamién animar a quien s’avere a sumase al baille.
Pela so parte, el Coru Mineru de Turón va aportar la so voz a esta selmana nel actu entamáu pola Academia de la Llingua Asturiana del vienres 8 de mayu nel Teatru Campoamor d’Uviéu, reforzando el calter cultural y identitariu de la convocatoria. Amás, l’actu nel que tamién se va dar entrega del IV Premiu nacional de Lliteratura Asturiana a la poeta Berta Piñán, va empezar cola actuación de la gaitera Olaya García García.
Suscríbite a les nuestres novedaes
