Ochobre publiquen ‘La rabia nos dientes’, el so segundu discu

Acabó la espera. Siete años dempués del so estrenu discográficu, Ochobre llancen en CD y en toles plataformes musicales La rabia nos dientes. El discu ye un reflexu de la evolución granible que tuvo en tolos aspectos la banda más moza del rock astur, con nueve temes punk-rock y nos qu’hai pingarates d’otros sones como’l hardcore, celtic punk, la música tradicional asturiana, el punk melódicu, o’l metal. Too ello con unes lletres enllenes de mensaxe social, coinciencia de clase y de país.

Les lleendes urbanes, la probitú que xenera’l capitalismu, la situación del mundu rural, el flamenquismu o la llucha feminista son dalgunes de les temátiques presentes nesta obra. Los testos de cuasi tolos cantares son autoría d’Adrián Calvillo -primer cantante de la formación-; los temes tán grabaos, producíos y mecíos por Pablo Viña nel so estudiu de grabación y tola producción ta engalanada nun cuidáu diseñu deIago Datriga.

La rabia nos dientes aporta dempués d’un camín llargu y sele, pero con pasos bien afitaos. A finales de 2018 Ochobre publicaben el so primer discu, Sobredosis de Grisú, col que siguíen el camín abiertu por otres bandes de xeneraciones anteriores del rock astur como Dixebra, Skontra o Gomeru. Tres d’un cambiu de formación -na que destaca la incorporación de Raichel a la voz- llanzaron en 2021 el videoclip ‘¡Autodefensa, muyer!‘ qu’espeyaba una bona evolución.

Tres cuatro años de siguir pisando escenarios y componiendo les canciones, la banda-punk entró a grabar La rabia nos dientes y asoleyó esta primavera dos cenciellos escoyíos coles idegues bien clares: primero llanzaron ‘Sélo‘, un cantar punk-rock que cunta cola collaboración de Pitxe, mítica cantante y guitarrista del punk-folk que dende hai más de venti años tien tocao en formaciones como Falkatrúa, Skontra, Brutus Daughters o The Cilvrnigans. Llueu aportó ‘Los Naides‘, tema que presentaben como’l «mui distintu al resto« y nel qu’enseñen la so cara más hardcore. Agora, La rabia nos dientes yá ye una realidá y l’amuesa de que la espera pagó la pena.