Publícase un videu resume de la Nueche en Danza d’Antroxu

Depués de tar dos años ensin poder facese por culpa l’andanciu, el pasáu sábadu 12 de marzu en L’Infiestu volvió la Nueche en Danza. Toles actividaes programaes polos organizadores foron un éxitu, algamando tolos oxetivos d’esti tipu d’eventos que se definen como una «xuntanza de xente pa baillar, tocar y cantar ensin más pretensión que la de pasalo bien». Yá pue vese un resume na canal YouTube del músicu y etnógrafu Xosé Ambás, que publica’l videu d’esta nueche na que xubieron al escenariu más de 15 agrupaciones musicales, con una respuesta ablucante del públicu, qu’amás participó na cita mazcaritao.

La Nueche en Danza, el pasucais de los Sidros de Valdesoto y el taller de baille tuvieron organizaos por La Benéfica de Piloña, LaKadarma, Les Ablanes, l’Asociación Vecinal Ríu Fontoria d’Areñes y l’AMC Bocanegra; too ello col sofitu del Ayuntamientu de Piloña y la collaboración del colectivu de les nueches en danza. Con esta cellebración, la Nueche en Danza llega a la so edición ventidós, depués de qu’en marzu de 2015 s’organizara per primer vez esta xuntanda que revitaliza y da-y puxu a la música y el baille tradicional asturianos,

Mercar discos de pandereta na tienda online