El grupu d’electrónica, hardcore y punk PVXARRA ta acabante de llanzar un tema nuevu tres d’estrenase’l pasáu mes de xunetu con ‘TIESLO TOU (NUN QUIES NA)‘. Trátase de FURACU (COMIÓME), una pieza que cunta cola collaboración de Desaniciu gracies a samplear cola so autorización el cantar ‘Pena‘ d’esta banda crust. Nun son los únicos samples presente nesti corte de hardcore electrónicu, tamién sampleen ‘Red Socks‘ de Foals y un fragmentu de los debuxos animaos Aventure Time.
«Andábemos componiendo, echando un café y charrando mientres sentíemos música, cuando salió na playlist l’últimu tema qu’asoleyaron Desaniciu», desplica Ferla Megía sobre l’orixe d’esta pieza. «Sampleamos la parte vocal del tema y amestámosla al nuestru, una pieza per inspirada na banda Death Grips, onde xugamos munchu colos cambios de ritmu, el ruíu y un sentimientu d’ansia y prises… terminamos esi tema en cuestión de dos hores. Pasámos-yoslo a Desaniciu y pidímos-yos permisu pa usar el sampléu; a ellos tamién-yos prestó’l tema, asina que pensamos n’asoleyalo como una collaboración«, añade’l productor de PVXARRA.
D’esta manera, la banda crust y la banda de hardcore electrónicu axúntense nesa contundente pieza que surde tamién de l’almiración de PVXARRA por Desaniciu. Como desplica Megía: «Flípanos esa banda, vímoslos per primer vez nun conciertu organizáu en La Felguera onde s’axuntaben una montonera de bandes de punk, y ablucamos. De fechu esi foi el día que diximos ‘esto de PVXARRA tien que dir en serio'».
Suscríbite a les nuestres novedaes
