Como ye vezu per estes feches al escomenzar la seronda, l’asociación Reciella. Families pol Asturianu asoleya’l cantar qu’acompaña a la celebración del Día de la Reciella, que yá algama les nueve ediciones. Nesta ocasión l’intérprete protagonista ye’l cantautor turonés Alfredo González, que firma un tema tituláu «L’asturianu conéctate» de calter pop y una lletra que xuega metafóricamente con que la nuestra llingua val pa comunicase y tar conectáu/ada colos amigos y amigues. A la composición d’Alfredo González hai qu’añader los arreglos y la producción del corveranu Sergio Rodríguez, responsable de Tutu Estudios, onde se grabó y mezcló’l tema. Tampoco podía faltar el vídeo-clip qu’acompaña siempre al cantar correspondiente, na presente edición el realizador foi Pablo A. Quiroga y les localizaciones foron Xixón y Villaviciosa.
El IX Día de la Reciella va desenvolvese -dende les 11:00 hasta les 19:00 hores- esti próximu sábadu nel Muséu del Pueblu d’Asturies (Xixón), con bien d’actividaes dirixíes a los neños y neñes y a les families en xeneral, ente elles xuegos, desfile de moda, axedrez, valtu o cosplay, dalgo que prestó abondo l’añu pasáu y que repite agora. Ente los actos esclusivamente musicales destaca la incorporación, pela primer vez, d’una pinchada didáctica de música xamaicana a cargu de los responsables del programa Ximiélgalo Radio Show de Radio Kras, y un conciertu d’Alfredo González, too ello nel Tendayu. Nesta xornada tamién vamos tar presentes musicasturiana.com con un puestu nel que poder mercar los nuestros productos rellacionaos toos cola música del país.
Amás de l’asociación organizadora Reciella, collaboren otros colectivos, clubes y entidaes, col apoyu de la Oficina de Normalización Llingüísticca del Conceyu de Xixón.
Suscríbite a les nuestres novedaes
