La música asturiana sigue espardiéndose fuera de les nuestres llendes y cada vez son más los estilos estremaos d’esta escena que percuerren distintos puntos d’Europa. Esta selmana dos de los artistes más representativos de la música nueva asturiana, Rodrigo Cuevas y Ferla Megía, anunciaron feches internacionales que los van llevar a tocar en Francia, Portugal, País Vascu y varios sitios del Estáu español.
La xira La Belleza de Rodrigo Cuevas entamó n’abril y llévalu a percorrer una montonera llugares de tola península ibérica: Galicia, Cataluña, País Vascu, Madrid, Valencia, Murcia… Agora ta acabante de sumar cinco feches fuera del Estáu español. En payares va tocar nes ciudaes portugueses de Lisboa y Oporto y en xineru de 2027 va facelo nes franceses de Lieusaint, Nanterre y Noisel.
Per otru llau, Ferla Megía fai ente xunetu y setiembre la so primer xira internacional, con doce feches confirmaes. Santander, Bilbao, Biarritz, Burdeos, Nantes, Vannes, San Pedro Bercianos o Ermua son dalgunes de les poblaciones onde va tocar. Dientro d’esti tour destaca la presencia en festivales como l’Harrikada Festibala d’Izarra -un eventu que se presenta como «techno queer y transfeminista»-; el prestixosu Festival Interceltique de Lorient; l’eventu rural d’arte, música y tradición SUCO Festival; y el Folkez Blai, veterana cita folk vizcaína. Tamién tien una fecha nueva n’Asturies, el 28 d’agostu nel Xagó Surf Co. de Gozón que completa una xira presentación del discu Páxaros 01+ Páxaros 02 que, dende qu’arrancó en febreru d’esti añu, confirmó ventiséis actuaciones.
Estes actuaciones súmense a munches otres que tán teniendo los grupos que canten n’asturianu fuera de les nuestres fronteres, lo qu’amuesa l’interés qu’existe por esta escena y el potencial de la música’l país por crear Marca Asturies.
Suscríbite a les nuestres novedaes
