«Tenemos la formación que buscábemos, cantares fechos con rixu y amor y munches ganes de facer música»

Siguen surdiendo grupos mozos nuevos de música n’asturianu. Tres de presentase apocayá Entós y Rellume, la selmana pasada abrieron les sos redes sociales La Ciudá nel Mar, un proyectu formáu por Andrés García (guitarra), Marina Pangua (voz, percusión, guitarra), Celia Nieto (vigulín) y Ángel ‘Tom’ Villa (vigulín). La so instrumentación yá amuesa la particularidá d’un soníu que bebe de «varies fontes» -como desplica Marina Pangua-, ente les que destaca «la canción d’autora cola música folk y de raigañu, dalguna pingarata indie…» amás de lo que-yos «apeteza y apaeza na ruta».

La semiente d’esti cuartetu remóntase a 2019 cuando «Elías García y Diego Pangua ficieron d’alcagüetes nel Festival de Lorient» conversando cola cantante. «D’ehí surdió una primera formación», comenta Pangua, añadiendo que «col pasu y el posu del tiempu, a la fin prendió con fuercia aquella semiente y tenemos la formación que buscábemos, cantares fechos con rixu y amor y munches ganes de facer música.»

La lliteratura ye otru de los pegollos de La Ciudá nel Mar y amuésenlo hasta nel nome, que «vien d’un poema d’Edgar Allan Poe: The City in the Sea«. Asina ye como la vocalista, percusionista y guitarrista desplica que «les lletres tán mui cuidaes», que creen «muncho na simbiosis de música y lliteratura» y, poro, dan «gran importancia al testu». Precisamente, el so primer conciertu va ser p’acompañar la presentación de la novela Pel norte n’El Cantu Llunada, obra de la propia Marina Pangua na que «la música popular tien un papel fundamental» y qu’algamó’l Primer Premiu de Narraciones ‘Muyer’ de la editorial Trabe.

Conciertu y EP

Esta primer actuación va ser el 19 de xunu a les 19.15h nel Centru de Cultura Antiguu Institutu, nel marcu de la Feria del Llibru de Xixón. Pero enantes, La Ciudá nel Mar va entrar «en pocos díes» al estudiu de grabación pa dar forma a «un EP con dalgunos de los cantares que formen el repertoriu», esclaria Pangua. Col surdimientu d’esti grupu nuevu, la mocedá asturiana sigue amosando qu’hai relevu xeneracional nel folk del país.