El pasáu añu Skama la Rede dio un conciertu históricu en Las Dunas de Verdicio. Esti chiringuitu de playa asitiáu nun entornu natural perguapu acoyó a la banda de ska-punk y a un montonera xente qu’esfrutaron con un recital nel qu’hasta se prendieron bengales. Esti xueves 28 la historia pue volver a repetise na actuación que’l grupu lluanco-candasín-maliayu va dar a les 20.30h nesti mesmu espaciu.
«L’añu pasáu sorprendiónos pa bien la cantidá de xente que s’averó a Verdicio y lo animao que resultó’l conciertu. Tamos avezaos a tocar a otres hores y suponemos que l’horariu d’última hora de la tarde y un sitiu tan afayadizu influyeron pa bien. Suponemos que’l xueves va ser asemeyáu», valora Miguel Fernandi Burilo, vocalista de Skama la Rede, al rodiu la esperiencia d’esta actuación ‘rara avis’ dientro de la trayectoria de más de venti años del grupu.
Nesti conciertu, van poder sentise temes nuevos que recueye’l próximu trabayu del grupu y otros míticos: «Tamos preparando’l set list y cuasi de xuru que vamos tocar los cuatro cantares nuevos. Vamos facer un conciertu llargu con tolos clásicos de Skama La Rede y con dalgunos vieyos que fai tiempu que nun tocamos», añade Burilo.
El conciertu dase nun contestu nel qu’hubo mui poques oportunidaes de disfrutar de rock astur en directo esti branu y coincidieron toes estos díes: la selmana pasada tocaron Dixebra y Skontra en Fiestes de Baíña, mañana ye esta actuación de Skama la Rede y el sábadu toquen La Tarrancha y Ochobre nel Rockvera. Nesti sen, el cantante sorraya qu’ellos siempre fueron «más de tocar na primavera y na seronda que nel branu», aunque sí que considera «un poco raro tan pocos conciertos de grupos de rock astur». «Supongo que la desapaición casi dafechu de les nueches celtes tien que ver abondo«, camienta.
Amás d’esti conciertu, la formación ska-punk ta d’actualidá a cuenta de la publicación del so próximu trabayu col que van festexar más de venti años de carrera. L’álbum va incluyir cantares nuevos -como ‘Escuela Asturiana‘, estrenada el mayu pasáu nel marcu de les movilizaciones del profesoráu de la educación pública- y una actualización de les canciones del 2019 que grabaron pero nun s’enxertaron en nengún discu físcu. Pa ello, dalgunes de les voces más conocíes de la escena asturiana collaboraron na grabación.
La música va publicase en vinilu y va dir acompañada d’un llibru que contién una esbilla de semeyes, entraes, carteles y recortes de prensa -sobremanera de la dómina primera de Skama La Rede-, amás de testos de xente cercano a la banda. Tamién el grupu anuncia que’l mes qu’entra van «grabar un videoclip con otru de los cantares nuevos».
«Marcháronnos los plazos un poco de les manes. Si nun yera una cosa, yera la otra. L’autoxestión superónos pero bono, yá ta ehí«, desplica Burilo en rellación al retrasu del llanzamentu del discu. Sicasí, yá nun va haber más: «Yá recibimos les primeres pruebes del vinilu y el llibru ta cuasi rematáu. Sal primero d’acabar esti añu, de xuru».
Semeya cedida por Pablo Semeyes.
Suscríbite a les nuestres novedaes
