El grupu punk-rock Asturtralla asoleyó’l vienres pasáu en toles plataformes musicales el so trabayu discográficu nuevu, Roxos Fame Pioyos. Trátase d’un EP de cuatro temes nos que la gaita «destaca más que n’otres ocasiones», como desplica’l cabezaleru del grupu, Xelu Estébanez, y con unes lletres qu’entemecen reivindicación, ironía, crítica social y humor. El trabayu va presentase en directo’l 28 de marzu en La Traviesa y va editase tamién nun CD que compila estos cantares y tolos que’l grupu foi llanzando’l en formatu dixital dende 2023.
«‘Kutxo‘ ye un tema bastante macarrilla y punki, que ta escrita con K y TX porque ye’l primer cantar que ficimos Iker y yo pa esta etapa nueva d’Asturtralla, y como él ye de Barakaldo por eso escribímoslo asina», desplica’l cabezaleru del grupu sobre’l tema qu’abre l’EP. Síguilu ‘Fame, Sidre y Rockangaita’ -«una canción bastante allegre pa que la xente se pegue unos emburriones mentanto bailla»-; ‘Asturtralla 2.0’ -«una instrumental con protagonismu de la gaita»- y ‘Zarréu‘, el cantar que se presentó como single del álbum y que ye un mediu tiempu dedicáu a toles víctimes de la minería.
«Esmerámonos un poco más na portada y esta fízolo Eva Busbé«, comenta Xelu Estébanez sobre la obra visual qu’ilustra los cuatro cantares nes plataformes dixitales. Estos temes van poder sentise tamién nel CD Fame, Sidre y Rockangaita, el discu qu’Asturtralla va asoleyar pal conciertu que van dar el 28 de marzu en La Traviesa. Nél compílense los cantares que’l grupu foi publicando dende 2023 en formatu dixital: los del EP Grasa pal focicu, les versiones de Dixebra, Eskorbuto y La Polla y el tema dedicáu a les 6 de la Suiza nel que collabora Raque d’Ochobre.
Col llanzamientu d’esti EP Asturtralla calecen l’ambiente pa la so vuelta a los escenarios. El sábadu 28 de marzu, a les 21.15h, con entrada de baldre, La Traviesa de L’Infiestu va acoyer l’arranque de la xira Ensayos con xente nel que’l grupu punk-rock va volver a tocar en directo dempués de 30 años. Amás, el grupu anuncia que yá ta hai interés pa que dean más conciertos notros sitios de dientro y fuera d’Asturies.
Suscríbite a les nuestres novedaes
