La Conceyalía de Festexos del conceyu d’Avilés entama’l nuevu festival folk Al Son de Payares pa celebrar la seronda esti vienres 29 de payares dende les 19h na plaza’l Parche. Nél van actuar Ún de Grao Trío, Algaire y DJ La Güeriata.
Ún de Grao Trío ye la propuesta del so cabezaleru, José Martínez Álvarez, de reinterpretar pieces de tonada y otres músiques de raigañu asturianu pa empobinales hacia soníos propios del rock, del jazz o de la bossa nova. Tradición y vanguardia con un estilu personal que fai que cada cantar suene contemporáneu dafechu.
Algaire ye una banda formada poles pandereteres y cantantes Loreto Suárez, Iratxe Espina y Carla Miranda, y el guitarrista Juan Yagüe. Coral y Maera (2022) foi’l so primer discu, nel que suena música tradicional fusionada con estilos contemporáneos como’l pop, rock, electrónica o la música llatina, p’asina averar los sones de raigañu a nuevos públicos.
La nueche del vienres va finar cola intervención de La Güeriata DJ, que yá actuó nes fiestes de San Agustín esti branu y torna a Avilés a facer baillar al públicu colos sos ritmos nes que suenen músiques del mundu, electrónica y tamién hai espaciu pa los sones d’Asturies.
Suscríbite a les nuestres novedaes
