Naz una nueva formación folk: Entós, el nuevu proyectu de Celia Nieto -vigulín (Corquiéu, Draque)-, Javi Menéndez -guitarra/bouzouki (La Garrapiella)- y Adrián Argüelles -xiblata (La Garrapiella)-. El tríu propón la so visión personal de la música asturiana de raigañu, mesmo con igües y versiones de temes tradicionales como coles sos propies composiciones, influenciaes por DRD, Talabarte o Kornog, ente otros.
El pasáu sábadu 12 d’ochobre ficieron la so primer actuación nel Cervera Beer de Cervera de Pisuerga (Palencia) y ayeri mesmo anunciaben nes sos recién estrenaes redes sociales que tán finando la grabación de dellos temes instrumentales nos Estudios 15:40 de Perdones. La so música va poder sentise nestos caberos meses de 2024.
Entós surdió «tocando xuntos por diversión y ensin más pretensiones», pero «acabó desembocando na curiosidá d’afondar n’igües y repertorios más ellaboraos», confiesen. Los tres músicos, amás, reivindiquen «que les nueves xeneraciones hemos siguir siendo correa de tresmisión de la música tradicional al través de nueves agrupaciones», como la que tán acabantes de formar ellos, Celia, Javi y Adrián, tres bonos instrumentistes con abonda esperiencia n’otros grupos y bandes que s’axunten nesti nuevu proyectu.
Suscríbite a les nuestres novedaes
