Esti vienres 13 de payares l’Archivu Históricu acueye la gala d’entrega de los Premios APECA 2025 que concede l’Asociación de Protocolo, Eventos y Comunicación d’Asturies. Esti añu la música asturiana ta presente ente les distinciones gracies a que’l Festival Intercélticu d’Avilés va ser gallardonáu como eventu ganador de la estaya de «Proyección y Alcance«.
«El Festival Intercélticu d’Avilés recibe esti reconocimientu pola so estraordinaria capacidá de trescender l’ámbitu llocal y situar a la ciudá nel mapa cultural internacional. A lo llargo les sos ediciones, algamó atraer a miles de visitantes y participantes de países estremaos, convirtiéndose nun puntu d’alcuentru únicu pa la música, la danza y les tradiciones celtes», argumenten dende APECA.
Amás, l’asociación destaca qu’esti festival «non namás arriquez la vida cultural d’Avilés y d’Asturies, sinón que tamién impulsa’l turismu, dinamiza la economía llocal y favorez l’intercambiu cultural ente comunidaes». Por too esto la Xunta Directiva d’APECA concede esta distinción a esti festival que yá tien XXVIII ediciones celebraes.
Suscríbite a les nuestres novedaes
