Güei entama la décima edición del Festival Arcu Atlánticu, eventu dedicáu a la música, teatru, danza, artes plástiques y audiovisuales, gastronomía y cine de les distintes identidaes culturales que formen la rexón atlántica. Hasta’l domingu 3 d’agostu Xixón acueye esta cita na que, ente les aproximadamente 60 actividaes programaes, hai siete conciertos de música n’asturianu: Etxebarria y Varela Dúu, José Manuel Tejedor y collacios, Entós, Alienda, Pandereteros d’Anguaño, Ferla Megía y Héctor Braga.
El dúu formáu pol músicu vascu Roberto Etxebarria y el multiinstrumentista David Varela, Etxebarria y Varela Dúu, abre la programación de música’l país el miércoles 30 a les 18h nel Campu Les Monxes (Cimavilla). Esi día tamién toca, a les 19.30h nel Muséu del Pueblu d’Asturies, el pernomáu José Manuel Tejedor nun espectáculu nel que va tar acompañáu de collacios.
Pal xueves 31 el folk mozu asturianu enllena la programación colos conciertos del tríu de folk de cámara Entós (19h, Campu Les Monxes) y del grupu power folk Alienda a les 20.30h nel Centru de Cultura Antiguu Institutu. El vienres 1 ye Pandereteros d’Anguaño quien va llevar el so proyectu de música tradicional pal baille con lletres actuales a la Plaza Xovellanos (19h).
Los conciertos d’Asturies complétense’l sábadu 2 cola propuesta electrónica, pop, folk y urbana de Ferla Megía (19h, Campu Les Monxes) y Héctor Braga, que va presentar Rabil nel Centru de Cultura Antiguu Institutu a les 20.30h. Amás d’estes actuaciones, l’Arcu Atlánticu tamién acueye’l domingu 3 a les doce’l mediudía’l Desfile Tradicional del Día d’Asturies nel que toles agrupaciones tradicionales de Xixón van dende la Plaza Mayor hasta L’Atalaya, onde llueu hai la Xira.
Amás de la música’l país, el X Festival Arcu Atlánticu inclúi una montonera d’actividaes rellacionaes col teatru, danza, artes plástiques y audiovisuales, gastronomía y cine d’Asturies y d’otros países atlánticos. Na estaya musical van actuar los portugueses Miguel Carvalhinho y Pedro Ladeira (martes 29, a les 19h nel CCAI), les gallegues Fillas de Cassandra (martes 29 a les 22h na Plaza Mayor), los bretones Skolvan (miércoles 30 a les 22h nel CCAI) y tamién ye’l I Alcuentru de Coros Xóvenes del Norte d’España, nel que participa’l Coru Xoven de Xixón.
Suscríbite a les nuestres novedaes
