Esti fin de selmana celébrase’l III Semando Fest, el festival de música moza n’asturianu. Les entraes anticipaes pal conciertu del sábadu 8 de febreru a les 21h en Lata de Zinc -nel que van tocar Abéu, Ferla Megía, Alienda y Melandru-, siguen vendiéndose a un bon ritmu y yá namás ta disponible’l 20% del aforu. Amás, dellos medios de comunicación tán faciendo conteníos especiales sobre esti eventu nos que tán participando dellos de los sos protagonistes. Ye’l casu de los programes de RTPA Sentir Asturies, Al Son, Asturias al Día, Conexión Asturias y, esti vienres 7 a les 20h, ta programáu otru especial d’Alderiques 2.0. Tamién el vienres 7 a les 22h ye la Semando Folk Session a la que puen apuntase instrumentistes enllenando esti formulariu, anque nun ye obligatoriu pa participar.
El vienres pasáu el programa Asturias al Día de RTPA, dirixíu por Roberto Pato, dedicó más de 30 minutos al III Semando Fest. Na entrevista –pue vese equí dende’l minutu 1:16:11 tuvieron presentes Paula Vega y Óscar Vega d’Abéu, Iyán Ploquín y Álvaro Cueto de Melandru, y Xicu Ariza, director de Musicasturiana.com y del festival. A esti últimu tamién lu convidaron a Sentir Asturies, onde foi entrevistáu por Inaciu Galán y tuvo acompañáu al micrófonu por Raúl Alonso, ún de los cofundadores del podcast Héroes ensin nome y copresentadores de la gala del Semando Fest. Tamién el programa de RPA especializáu na música’l país y dirixíu por Xune Elipe, Al Son, dedicó toa una hora al Semando Fest y a los grupos participantes en compañía d’Ariza y, por último, Arantxa Nieto tamién entrevistó en Directo Asturias al responsable del eventu.
Amás de la cobertura de la radiotelevisión pública y otros medios de comunicación privaos, Alderiques 2.0 va facer esti vienres a les 20h un directu na so canal de Twitch na que van tar presentes componentes de los cuatro grupos participantes na tercera edición del Semando Fest Abéu cola so música tradicional axeitada pal baille; Ferla Megía, col so amiestu de pop, folk, triphip, dembow o rap; Alienda, banda de power folk que sigui’l camín de los meyores nomes del folk asturianu; y Melandru, formación de post-rock influyía pol shoegaze, dream pop y el folk.
Semando Folk Session
La tercer edición del festival incorpora una novedá: la Semando Folk Session, una oportunidá pa que toles músiques y músicos mozos que quieran, andechen pa interpretar a comuña los sos temes preferíos de la música tradicional y folk asturiana. La cita va ser el vienres 7 de febreru a les 22h en L’Esperteyu (Uviéu) y nella pueden participar los y les instrumentistes que tengan gana de tocar nesta jam session pionera. Hai un formulariu pa inscribise, anque nun ye obligatoriu rellenalu.
Amás, pa celebrar esti III Semando Fest, va una selmana Musicasturiana.com asoleyó la playlist Semando música moza n’ast, que complica cantares d’anguaño y d’antaño d’estilos estremaos cola característica de que quien los grabó nesi momentu fueron artistes xóvenes de la escena.
Suscríbite a les nuestres novedaes
