En xunu va facer 20 años dende qu’Igor Medio y Carlos Redondo finaren nun accidente de tráficu cuando diben camín d’un conciertu con Felpeyu. Son dos décades d’ausencia d’unes de les figures más queríes y respetaes de la música fecha n’Asturies y, sobre manera nel casu d’Igor, de la música tradicional. Va unes selmanes la Sociedá Cultural Xixonesa pidió al Conceyu de Xixón que nel paséu nuevu de Naval Azul d’El Natahoyo hubiera un «espaciu urbanu» dedicáu a Igor, que yera d’esti barriu. L’Ayuntamientu ta acabante d’anunciar qu’en xunu va inaugurase.
«Igor Medio ye una figura fundamental pa entender la cultura, non namás pola so contribución musical y plástica, sinón tamién pola so capacidá pa dignificar la identidá d’un barriu y la memoria colectiva«, desplica l’Ayuntamientu de Xixón nun comunicáu. Nél sorrayen qu’Igor, como miembru fundador de Felpeyu, «supo entemecer tradición y vanguardia dando voz a una xeneración comprometida cola so tierra y la so realidá«. Amás, destaquen que «el so venceyu col barriu d’El Natahoyo marcó fondamente la so trayectoria; un entornu portuariu y industrial que moldeó la so sensibilidá artística y la so conciencia social«.
D’esta manera ye como pal Conceyu, «Igor Medio nun representó namás al so barriu, sinón que lu proyectó como un símbolu cultural, convirtiendo la so música nuna ponte ente la tradición y la cotidianidá de la ciudadanía». Por toes estes razones l’actual cai Palafox va cambiar el so nome nel mes de xunu, tres de la celebración d’un actu n’homenaxe a esti creador xixonés clave pa la cultura asturiana.
Ígor Medio Tuya (El Natahoyo, Xixón, 1972-Zuya, Álava, 2006) foi un destacadísimu músicu en grupos folk como Felpeyu y dibuxante en numberosos periódicos y revistes de cómic. Un accidente de tráficu’l 24 de xunu de 2006 terminó cola so vida y la de Carlos Redondo, compañeru nel grupu musical Felpeyu, cuando diben camín d’una actuación en Barcelona. El gobiernu del Principáu d’Asturies dedicó-y la edición 2022 de la Selmana de les Lletres Asturianes pola so aportación fundamental a la cultura fecha en llingua asturiana y tamién Xixón entama cada dos años un ciclu de folk de cámara que lleva’l so nome. Apocayá, so madre, Sonia Tuya, cedió nun actu públicu tola so obra gráfica al Muséu del Pueblu d’Asturies.
La infancia d’Igor Medio ta venceyada al barriu onde nació. So padre, Luis Medio, y so madre Sonia Tuya, yeren militantes comprometíos a favor de la democracia nel añu en que nació Ígor. Nació en xineru de 1972 y en setiembre d’esi mesmu 1972 Sonia y Luis fueron, xunto a otros homes y muyeres de la Sociedá Cultural Natahoyo, fundadores del Día de la Cultura, una fiesta de prau que supunxo un enantes y un dempués nel asociacionismu xixonés. Amás, Luis y Sonia fueron decisivos nel movimientu vecinal del barriu dende l’Asociación de Cabeces de Familia y dende l’Asociación de Vecinos Atalía. «Dende neñu aprendió Ígor Medio’l sentimientu de pertenecer a un barriu -primero El Natahoyo, depués Montiana-, y el conceptu de compromisu social», defendó la Sociedá Cultural Xixonesa nel comunicáu col que reclamaron una cai pa esti artista.
Suscríbite a les nuestres novedaes
