Esti sábadu 5 d’ochobre celébrase en Xixón el XI Día de la Reciella, una xornada interxeneracional na que va haber música, teatru, baille, deporte, xuegos, moda, gastronomía, mercadín y la sesta edición d’Entaína, la carrera familiar pol asturianu. Como tolos años, esta xornada tan especial tien una temática concreta a la qu’un artista de la música’l país pon-y banda sonora. Esti 2024 ye’l raperu xixonés Mostru l’Horru l’autor del cantar «Col asturianu xugamos n’equipu», que yá ta en toles plataformes musicales y que s’asoleya acompañáu d’un videoclip obra del realizador audiovisual Pablo A. Quiroga Prendes.
El videu ta producíu por Algamar Producciones con Chusa Rodrígo y Sofía Castañón; Alejandro Nafria foi’l cámara y tien la collaboración de Cuatro Gotes. Amás collaboraron los equipos y empreses Unión Club Ceares, Veriña, Gijón Femenino, Círculo Gijón Noega Baloncesto, Club Escuela de Ciclismo Las Mestas, BMG Balonmano Gijón, Gijón Solimar Hockey Club, Guaje Skates La Güestia Roller Derby y Rugby Llanes
Mostru l’Horru ye proyectu de hiphop n’asturianu fundáu en 2021 pol xixonés Fran Méndez y nel que participa’l productor llangreanu Zeros. ‘Señales de Fumu’ (2022) foi’l so primer trabayu, un discu rap con lletres combatives y ocho cantares nel que tamién suenen influyencies d’otros estilos como’l reggae o’l rock.
Suscríbite a les nuestres novedaes
