Güei entama en Manresa (Cataluña) la Fira Mediterrània, un eventu que dende hai 28 ediciones trabaya coles propuestes artístiques qu’usen el raigañu, la tradición y la cultura popular como motor creativu. Asturies va tar presente na programación xunto a otros países del mundu gracies al conciertu que van dar Mapi Quintana y Rubén Bada col espectáculu Working Class y a un alderique nel que va participar Carlos Barral d’El Cohete Internacional. Tamién Xicu Ariza, responsable Musicasturiana.com, va asistir como profesional de la industria cultural.
La Fira Mediterrània defínese como «una feria multidisciplinar que plantega trés grandes itinerarios na so programación: ún de música, cola escena de músiques del mundu y música folk; ún de danza, con una mirada en movimientu al raigañu tradicional y la cultura popular; y ún de la memoria, llegáu y narración oral, coles propuestes d’artes escéniques y de cai, sobre manera de teatru y circu, que beben de la cultura popular». Profesionales y instituciones de tol mundu participen añalmente nesti eventu nel qu’hai actuaciones, alderiques, residencies artístiques, alcuentros comerciales y talleres formativos.
Asturies sonó na Fira Mediterrània en 2023 con un conciertu de Rodrigo Cuevas; en 2024 con unu de L-R; y esti 2025 van ser Mapi Quintana y Rubén Bada quien van representar a la música’l país esta tarde nel espaciu Els Carlins col espectáculu Working Class. Tamién ta dientro de la programación Carlos Barral, director d’El Cohete Internacional, mánager de Rodrigo Cuevas, poeta y activista cultural; que va participar nuna mesa redonda alrodiu los procesos d’acompañamientu y apoyu a artistes.
Na edición d’anguaño que va durar hasta’l domingu 12 d’ochobre ta presente per primer vez Musicasturiana.com. El so responsable, Xicu Ariza, va asistir al eventu como ún de los profesionales acreditaos col oxetivu de conocer de primer mano esta iniciativa tan destacada pa les músiques de raigañu del mundu, ampliar conocimientos nos alderiques y talleres, y visibilizar la escena musical n’asturianu a traviés del proyectu Musicasturiana.com. La participación na Fira Mediterrània d’esta marca y de les otres de la empresa Mecigaya Creativa SL -Ixuxú Cultura y Puru Remangu- ta financiada con una ayuda a la formación y profesionalización del sector cultural asturianu de la Conseyería de Cultura, Política Llingüística y Deporte.
Suscríbite a les nuestres novedaes
