Si de xuru hai dalgo que rescampla na Selmana Grande de Xixón d’esti añu 2025 nun foi’l conciertu de Bonnie Tyler, nin tampoco’l de Mojinos Escozíos o la nueche de los fueos artificiales. Nun fai falta nin siquier mirar con lupa a la so programación: nin siquier un artista de toles contrataes van facer una actuación n’asturianu y namás unu de los grupos son d’Asturies.
«Na Selmana Grande de Xixón nin siquier un artista de toles contrataes van facer una actuación n’asturianu y namás unu de los grupos son d’Asturies»
Venimos d’un añu 2024 onde pasaron pelos escenarios xixoniegos xente como Hevia (xunto con xente renomao de la escena asturiana, como Beleño), Rodrigo Cuevas y la so puesta n’escena impresionante o, saliendo de lo que ye la música n’asturianu, grupos reconocíos en tol estáu como Ilegales, el cantante Enol o la banda Querida Margot. Un añu 2024 que vieno marcáu pola llucha de la plataforma «Música n’asturianu SÍ» pa incluyir la presencia de grupos músicales con obra fecha n’asturianu dientro de la programación del Conceyu de Xixón tres les declaraciones del conceyal de festexos, Óliver Suárez, agora conceyal tránsfuga y enantes del partíu d’estrema derecha VOX. Un añu dempués d’esta cuestión, paez que l’equipu de gobiernu ganó la batalla cultural: nengún grupu que faiga música n’asturianu na Selmana Grande y la reducción a la mínima de la presencia de la escena musical asturiana nella.
Mentanto, l’Arcu Atlánticu paez ser el placebu pa toa esta situación: programando unos pocos de conciertos d’artistes asturianos dientro d’un festival que, magar de que nun entamu tenía un calter asturianista dafechu, va perdiendo adulces la identidá que lu caracterizaba y va siendo un eventu más onde l’asturianu tien una presencia xusta pa nun crear una crítica mala ente la sociedá.
«Si miramos a otres ciudaes como Pontevedra o Bilbao, los datos manquen. Perdemos identidá y cada vegada, nun mundu más globalizáu, Xixón paez querer ser más una gran ciudá ensin raigañu»
Si miramos a otres ciudaes con una cultura bayurosa como Xixón, los datos manquen. Por casu, nas Festas da Peregrina (Pontevedra), grupos gallegos y con música en gallegu como Ortiga, The Rapants o Iván Ferreiro, ente otros, encabecen el cartelu de les fiestes. Bilbo, que comparte feches de celebración con Xixón, sigue la mesma dinámica: bandes de xéneros estremaos como Dupla o Kai Nakai, amás d’una programación con presencia amplia del euskera protagonicen Aste Nagusia.
Xixón pierde identidá en tolos aspectos: piesllen establecimientos icónicos de la ciudá, el turismu masivu acaba cola vida de los barrios más céntricos y la música asturiana yá nun suena nes fiestes más importantes del conceyu. Perdemos identidá y cada vegada, nun mundu más globalizáu, Xixón paez querer ser más una gran ciudá ensin raigañu qu’una ciudá arguyosa del so pasáu.
Semeya cecida por Inaciu Galán, publicada na so cuenta de X
Suscríbite a les nuestres novedaes
