Rubén Bada participa nel conciertu Celtic Guitar Quartet

El conocíu multinstrumentista Rubén Bada, ún de los nuestros músicos más internacionales, participaba’l pasáu 23 de xunetu nun conciertu tituláu Celtic Guitar Quartet, dientro de la programación del Festival de Cornouaille (Bretaña). Nél axuntábense dellos de los meyores y más renomaos guitarristes de les músiques céltiques: el bretón Soïg Sibéril (que formó parte de grupos míticos d’esi país como Kornog, Gwerz o Pennoù Skoulm), el francés Jean-Félix Lalanne (compositor de bien de bandes sonores pa películes y autor xunto con Sibéril d’un discu tituláu Back to Celtic Guitar), Dylan Fowler -nacíu en Tripoli pero d’orixe galés- (perteneció a grupos folk importantes d’esi país como Taith o Alaw), y el yá mentáu Rubén Bada.

El conciertu desarrollóse nel teatru de Kemper/Quimper, capital de Bro Gernev (nome en bretón de Cornouaille), y el repertoriu del mesmu tuvo formáu por pieces compuestes polos cuatro participantes, amás d’otres tradicionales, ente elles delles asturianes. Los cuatro intérpretes amosaron la so calidá, virtuosismu y elegancia, ufiertando un conciertu únicu. Dende la propia organizacióin del Festival de Cornouaille facíen referencia a esti espectáculu con estes palabres: «De Bretaña a Gales pasando per Asturies, un verdaderu viaxe al traviés de les harmoníes céltiques que nos proponen estos cuatro grandes músicos».

Pa poder disfrutar del conciertu enteru podéis facelo nesti enllaz.

Comprar discos celta y folk na tienda online