Lisardo Lombardía dexa la dirección del Festival de Lorient

L’asturianu Lisardo Lombardía ta acabante d’anunciar que nel mes d’ochobre tien previsto dexar la dirección del Festival Intercélticu d’An Oriant/Lorient. La so rellación con esti Conceyu de los celtes/Emvod ar gelted (lema del festival) bien de lloñe, cuando nos primeros años 80 entama contactos cola so organización y llogra qu’Asturies seya acoyíu como país oficial en 1987, siendo nomáu delegáu del festival nel nuestru país, cargu qu’ocuparía hasta 2007, cuando llega a la so dirección.

Condideráu como ún de los eventos musicales más importantes a nivel mundial nesti tipu de músiques, el Festival d’An Oriant/Lorient, tuvo una importancia bultable nel desarrollu del folk asturianu, al posibilitar rellaciones y influencies ente los músicos del país y los del restu del Arcu Atlánticu. L’escaparate que significó y significa pa la nuestra música vióse reforzáu cola llegada de Lombardía a la dirección; amás abrióse a propuestes diverses y novedoses nun dexando que’l festival s’estancara, defendiendo un interceltismu contemporáneu y integrador. Depués de catorce años como máximu responsable del Festival d’An Oriant/Lorient va retirase en pasando la próxima edición, que fai la númberu cincuenta y va tar dedicada precisamente al país anfitrión: Bretaña.

Por cuenta d’ello, Lombardía, ufiertaba una entrevista esclusiva al periódicu local Le Télégramme onde fala de la so rellación col interceltismu y de toos estos años d’implicación y trabayu col festival. Podéis lleela nesti enllaz.

Comprar discos celta y folk na tienda online