Esta mañana presentáronse en rueda prensa los Premios Amas 2025 -qu’esti añu llega a la so venti edición- y yá ta abiertu’l plazu de votación a les distintes candidatures. Hai un total de ventidós categoríes de les que n’once hai presencia d’artistes rellacionaos cola música n’asturianu y/o de raigañu. Amás, de les 84 nominaciones totales, 26 son p’artistes que participen d’escena.
Como cada añu, les estayes nes que más nominaciones hai pa la música d’espresión asturiana son les venceyaes a la música folk. Nesti sen, esti añu tán nominaos a Mejor Disco Folk Daón de Beleño, Secretos sin contar de Rubén Alba, Misa de Fruela 757 y Son d’Ermu de Picarós. Na estaya de Mejor Canción Folk les escoyíes pol xuráu son ‘Corales de Cristal’ de Xera, ‘Polkamazurcas’ de La Bedur, ‘L.luna’ de L-R & Rodrigo Cuevas y ‘Lluna de Collecha’ d’Herbamora.
Na estaya de Gaita, tán nominaes la Banda Gaites Ribeseya, Banda Gaites Saxum, Banda Gaites Soto Rei y la Banda de Gaitas El Penedón de Castropol. Na de Mejor Canción Otras Escenas seleccionaron ‘Pela carretera’ de La Tarrancha y ‘Provinciana’ de Viuda y en Mejor Disco Otras Escenas Páxaros 01 de Ferla Megía. Tamién ta Hevia na de Mejor Directo.
Instrumentistes, lletristes y diseñadores
En cuantes a instrumentistes, tán Rubén Cadenas de Guieldu y Manu Molina (Nacho Vegas, L-R) na categoría de Batería; Juan Yagüe (Cerezal, Algaire, José Manuel Tejedor) na de guitarra; y Vero Rubio na d’Otros Instrumentos (trompeta). En Letras nominaron a Humber (Misiva) y Xandru Martino (Corquiéu) y na de Portada y diseño nominaron a Miguel G. Díaz por Vérsica, Mónica González por Fesoria a les Ortigues, Antón Barquero por Gaiteros de la Banda Gaites Fonte Fuécara y Ricardo Villoria por De Sópitu de Forma Antiqua.
Suscríbite a les nuestres novedaes
